Gaua
Soria, Jon Maia
1
Bertso berriak jarri behar ditut
hala bait dio arauak,
egia esan bertso batzuek
merezi bait ditu gauak.
Aurrerantzean horra doazte
nere hitz apal eta lauak,
al duen eran juzga ditzala
juzga behar dun jurauak.
2
Gauak baditu bere barnean
majina bat ezaugarri,
eta bertsoa bihurtu nahi det
horien erakusgarri.
Norbaitek zer den ez badaki're
emango det bere berri:
Iheslarien laguna eta
itsuen kontsolagarri.
3
Egun guztia lanean eta
nekez badaramakigu,
nola derrior eguzkia den
gure ekintzen testigu.
Ikusi duna ilargiari
esateakin aski du,
ta honek gauan deskantsatzeko
aukera ematen digu.
4
Udako egun baten erdia
dagoenean egina,
bururatzen da aldaketa bat
benetan eder ta fina:
Eguzkiaren menpeko zeru
argia eta urdina,
ilargipean bilakatzen da
izar guztien jardina.
5
Negua berriz izaten dugu
hezea eta lizuna,
eta gainera ondo dakigu
bukatu orduko eguna;
sasoi honetan osatzen dela
nahi ez dugun batasuna:
alde batetik neguko hotza
bestetik iluntasuna.
6
Denok dakigu gauak ditula
bere alde on ta txarrak,
pairatzen dituztenen artean
gu ez gerade bakarrak.
Zeruan ikus daitezkenean
ilargia eta izarrak,
auskalo zenbat gozatzen duten
hontzak eta xaguxarrak.
7
Modu askotan isil isilik
etortzen da gure bila,
baina hala ere kasu honetan
ez dago horren isila.
Gure herria gau luze baten
aurkitzen da erdi hila,
hau bestetik ez dut eskatzen
aguro senda dadila.
8
Esan bezala herria dago
iluntasunez beteta,
horregatikan gazteak gaude
bihotzeraino erreta.
Zeru beltzera begiratuaz
guztiok jarri arreta,
askatasunaren eguzkia
laister ertengo da eta.