28koari
Sebas
Hogeita zortzirako eratu
duten manifestapenaz,
zerbait esanez natorkizue
bihotz minez eta penaz;
ixilik egon beharko nuke,
baina honetan ezin naiz,
nola arraio jolas daiteke
gure gudari onenaz?
Kaka artean buelta ta buelta
nola ezkutatu hatsa?
hemen badago atsegin duenik
kolore hortako salsa;
gure herrian gertatzen dena
iluna da ta garratza
bildots artean oraindik ere
harro harro dabil hartza
Kondena mehetan ari zaizkigu
buru diren jelkideak,
heuren pisuak baditu nonbait
ezker eskuman aldeak;
bizi nahi dugu eta ez uka
hortako eskubideak,
kate hauk hautsi nahi ditunari
otoi, ez itxi bideak.
Nola demontre sinets daiteke
"bai abertzaleak dira",
gure gudari azkartxoenak
nahi badituzte erretira;
zerbait lortzeko beharko dugu
jo kale edo mendira
gutxi balio digu Madrildik
zer datorkigun begira
Geure gudari onak ukatuz
nekez inoiz askatuak,
ta gutxiago betetzearren
Madriltarren aginduak;
ezin ditugu alferrik galdu
dauzkagun bide hestuak,
harmen menpean gauden artino
gora gure harmatuak
Utzi UCD, PSOE ta PCE
utzi Madrilgo katarrak;
eta elkartu ditzagun behingoz
abertzalean indarrak.
Elkartu EIA , LAIA ta HASI
ESB eta ETArrak,
denon artean aska dezagun
gure aberri bakarra.