Nazionalistak eta ikurriñaren aurka?
Santakruz, Praixku
Kontatutzera noakizue
barruan dudan samina
nere mintzoa ez da izango
luzigarri eta fina.
Ikus'zazue gure herritar
batzuen zentzu arina
izenez beintzat abertzaleak
kristona dute egina:
peneubekoek kendu digute
Usurbilen ikurriña!
Gure bandera eskuratzeko
ibili gara jo ta ke,
«Euskaldun gara» esatea're
kosta da malko ta neke.
«Pakeagatik kentzea hobe»
orain esaten digute.
Ken ez dezaten guk ez jartzea
hori al da zuen pake?
Pakeagatik horrelakoak
ama're salduko luke.
Euskal bandera kaleratzeko
sentitzen dituzte lotsak;
Euskal Herria, begira zazu
zein abertzale eskasak.
Madrid aldean ziur daudela
militar-otsoak pozak,
Barrionuevoren legeak ditu
hemen estutzen arnasak.
Hainbeste duda et' erreparo
ez du euki Retolazak.
Herri trixte hau norantza doan
ez du Monzonek ikusten!
Konstituzi honi plazak altxeaz
gure ikurriña ukatzen,
Retolaza ta Galdos batera
goardizibilak agurtzen.
Herria zerbait maite dugunoi
digu bihotza urratzen:
gure etsaiei bandera t'armak
peneubekoak ematen!
Gure artetik anai-arrebek
aldegin zuten mendira,
zuzen ed'oker, bakoitzak ikus,
bainan abertzale dira.
Hoiek hiltzeko Barrionuevo ta
Vera datoz Euskadira.
Nola Elosegi ta Retolaza
zoazte hoien erdira?
Noren gorrotoz zaute Madrilgo
esku gogorrei begira?
Urte gutxi da Usurbildarrok
anai bat dugula galdu,
Joxe Martinen goraintzia ez da
herritarrontzat epeldu.
Bere hiltzaileak ta bera nola
gaur otar berean saldu?
Gizabidea urte gutxitan
hainbeste al da usteldu?
Gure banderak et'espaiñolak
berdin-berdin balio al du?
Esan zenuten: «Nakoa dugu
oraingoz puska honekin».
Zer den nahikoa, zer gutxiegi
edo geiegi, nork jakin!
Hasi zerate kexatzen orain
len emandakoarekin,
eskergarri da konturatzea
egindako hutsarekin
Bainan ez segi kolpe ta isekaz
osoa nai dutenekin.
Espainol bat ez naizela dakit
aitagandik ikasita,
Sabinek ere liburuetan
omen dauka idatzita.
Negar egingo luke gaixuak
gaurko Usurbil ikusita:
Peneubegatik udaletxeko
balkoi ederra hutsik ta
barruan denen buru Juan Carlos
erretratuan jarrita.
Zintzo dabilen abertzalea
mintzen ni ez neukan naia,
baina gertatzen diren gauzokin
ezin nengoke lasaia,
zabaltzen hasi baita edonun
traizioaren usaia.
Ardiz jantzi den hainbeste zerri
baztertzen gaitezen saia:
jakin dezagun anaia nor den
ta non dagoen etsaia.