Askatasunera
Andonegi, Iņigo
1
Jaunak hau zer da, politika da
ala kinkila azoka,
lehen Nafarroa medio zela
ihardun genuen mokoka,
gaur etsipenez hartzen da ia
independentzi borroka,
iadanik askok ez daki xede
politikoak non koka,
bitarte hontan Euskal Herria
neke gorritan borboka.
2
Erreformaren jaiotzarekin
Estatuaz batera
konturatzeke jarri gintuzten
espaņarren esanera,
geroz urteak daramatzagu
leku beretik berera,
akrobazia politikoak
konpondu ordez afera,
egonezina erakarri du
Herriaren bihotzera.
3
Estatutua izan ere da
urik gabeko errota,
hartik gabeko abertzalego
nagusiari porrota,
hilik jaio zen hitzarmen horrek
pasatu dio kuota,
orain elkarri ez alderrikan
botabolearen bota,
soluzioz lehengo bidea
berribiltzen dago-ta.
4
PSOEkumeak balkoitik ari
dira bidea neurtzen,
ixilik baina etengabeki
euskal harremanak sutzen,
pozik dakuste nola goazen
elkarrengandik urruntzen,
gaur bertan "sasi-pakea" bide
bagoazkie makurtzen,
gerora oker egingo zaigu
tranpa hortatik bihurtzen.
5
Bada etxeko pakea utziz
zuzendu dena Madrila,
Jainkoak daki zein paradisu
liluragarriren bila,
dastatu ala gustatuz joan
zaio hango morokila,
horra hor dzirt-dzart bilakatuta
PSOEn txalupamutila,
gaur bere erruz aplikatzen da
hemen estatu-gurpila.
6
Sozio ilun bezain aberats
bategan jarriz begiak,
oparitu nahi dizkigu lorpen
borobil eta handiak,
urregorrizko errepide ta
kristalezko jauregiak...
ez dituzte, ez, asebeteko
askatasun egarriak,
oso besterik exijitzen du
herri honen izerdiak.
7
Buruak uler ez ditzakeen
legeak ditu bihotzak,
horren lekuko dira preso ta
lagunen gorpu hilotzak,
errefuxiatu ta grebalari
askoren sabel huts hotsak...
hau ulertzetik urrun dabiltza
gobernari burumotzak,
patrika epel, uste ustelez
dabiltzan otso bildotsak.
8
Ikusi nahi ez duena baino
itsuagorik ez omen,
herri zahar honen asmo berria
ez dute nahi jakin non den,
nola guk hoiei ulertarazi
dugun mila itxaropen,
kolpez esango nieke hauxe,
ez baliatzeke hoben:
Ŧutz gaitzazue garena izaten
ta... ondorenak ondorenŧ.
9
Estatu orok herri txikiei
erasotzen die indar,
Espaņak ez nola Europak
bihurtuko gaitu izar,
gaurdanik babes ditzagun geure
mendi, baso eta ibar,
irmoki eman diezaiogun
estatu honi bizkar,
ez gaitzan seko utz betirako
ez hego eta ez ipar.
10
Justifikatze lanbrotsuak utz
eta goazen aurrera,
lehenago ere debalde samar
nahiko polbora erre da,
euskaldun oro berdinbidean
ongi konponduko gera,
nor dugun etsai eta nor lagun
helduz gero jakitzera,
irits gintezke buruak zutik
sasoiz askatasunera.