(Santa Ageda bezperan...)
Esku-makillaz etxerik-etxe
ateak jotzen ditugu,
Agate Deunaren izenean
gabon opa dizutegu.
Jai eder ori ospatutzeko
pozez kantari gatoz gu,
Asmo onean etorri gera
ta jaun andreok lagundu.
Alkate jaunari
Alkate jauna gaur zuregana
gatoz denok agurturik,
Limosnatxoa eskatutzera
gure txapelak kendurik.
Agate Deuna ospatutzeko
ote dan eskubiderik,
Pake onean igarotzea
ez degu beste asmorik.
Sendi osoari
Krabelintxoak bost orri ditu
larrosatxoak amabi,
Etxe ontako sendi ederrak
loretegi bat dirudi.
Guraso maite, kristau zintzoak
umeak azirik ongi,
Maitasunaren usai gozoa
zabaltzen dute ugari.
Dama gazteari
Leio batean lore tartean
izartxo bat da agiri,
Aldamenean txori polita
piu piuka kantari.
Txori polita, esan zaidazu,
-Zein da izar eder ori?
-Etxe ontako dama gazteak
emen egiten du argi.
Neskameari
Or goian dagon iturritxoan
ura pil pil dator beti,
Etxe ontako neskametxoa
zintzo, polit eta garbi.
Maitagarria zeradelako
azkok bai dizute begi,
Bat aukeratu nai bazenduke
emen gauzkatzu amabi.
Azken agurra
Agur, bai agur, etxeko denoi
Jaunak gabon dizutela,
Biotzez esker onak emanaz
orain bagoaz aurrera.
Agate Deuna jetxi dedilla
gozoro zuen artera,
Guzti-guztiok eramateko
zeruko gozamenera.