Pelota, euskal jokoa

Oyarbide, Florian

 -1-

 Astean ez det astirik eta

 zerbait egin bear jaian,

 papera eta luma artuta

 eserita nago maian.

 Bein da berriro bertso batzuek

 egoki ipiñi naian,

 orain, PELOTA, EUSKAL JOKOA

 irakurri dedan gaian.

 -2-

 Pelota degu euskal jokoa,

 senide maitagarriak!

 Punta, remonte, pala ta eskuz,

 danak ain zoragarriak.

 Frutu ederrik len eta orain

 eman du Euskal Erriak,

 ta berriz ere Jaunak nai badu

 sortuko dira berriak.

 -3-

 Tenis deritzan joko klasea

 omen da Australikoa;

 fubola edo ostikoketa

 berriz Inglaterrakoa.

 Boxeo edo ukabilketa

 Amerika aldekoa,

 baiñan pelota, joko eder au

 degu Euskal Errikoa.

 -4-

 Pelota degu atzerrietan

 asko gustatzen zaiena,

 errespetatzen dute joko au

 ez izan arren aiena.

 Pelotaria bera ere berriz

 euskalduna da geiena,

 baratza ere emen bai dago

 landare eder oiena.

 -5-

 Itz baterako pelota degu

 arbola baten berdiña,

 sortu zanetik orain artean

 eman du Frutu bikaiña.

 Adar luzeak mundu guzira

 zabalduak dauzka baiña,

 Euskal Errian, emen ordea,

 bere gerria ta zaiña.

 -6-

 Pelotariek jantzi zuria

 dute beren jatorria,

 ori omen da joko au bera

 sortu zanetik jarria;

 ta gerrikoak jazten dituzte

 urdiña eta gorria,

 zein zeiñen aurka diran jokoan

 ori da ezaugarria.

 -7-

 Asko ez baiñan nere sasoian

 zerbait egiten nuan nik,

 pelota artu eta frontoira

 ez bazegon beste lanik.

 An ere etzan falta izaten

 jolastutzeko lagunik,

 euskal mutillik ez da izango

 ortan ibilli ez danik.

 -8-

 Pelotan ondo egitekotan

 bear du afizioa,

 alde bat utzi parrandak eta

 ortan maiz egin saioa.

 Gorputz biguna anka ta beso,

 buru argi ta iaioa,

 ta batez ere mundu ontara

 pelotarako jaioa.

 -9-

 Gauza osasungarria oso

 pelotari berarentzat,

 ikuskizun bat zoragarria

 begira dagonarentzat.

 joko klase bat ederragorik

 ez da munduan neretzat;

 biotz biotzez au opa det nik:

 ez dedilla galdu beintzat.

 -10-

 Kristautasuna berekin dauka

 pelotak zorionean,

 «Angelus» ere errezatzen da

 txapelketa bat danean.

 Jende guzia umil da jator

 au ikusten degunean,

 beste alako sentimentu bat

 sortzen zaigu barrenean.

 -11-

 «Angelus» errezuan apaiza

 frontoian erdi erditik,

 juezak eta pelotariak

 beraren bi aldetatik.

 Begira dagon jendea ere

 orduan jartzen da zutik,

 Alguztidunak bedeinkatuak

 izan gaitezen zerutik.

 -12-

 Gu bizi geran lur bedeinkatu

 maitean sortutakoa,

 gure erriko edertasun bat

 ta gure odolekoa.

 Urrezko monumentu bat ere

 beretzat ez da naikoa,

 iñuntxo ere berdingabeko

 PELOTA, EUSKAL JOKOA!