Mutil baten pentsamentuak nesktxa bati buruz

Oyarbide, Florian

 1

 Goiko baserri batetik,

 errira zatoz goizetik;

 neskatxa eder, gazte, alaia

 zure bide zuzenetik,

 ikusten zaitut gogotik

 nere etxeko leiotik.(Bis)

 2

 Aurrez jartzen naiz begira,

 etortzen zeran tokira;

 noiz azalduko ote zeran zu

 bururik ezin det jira,

 zu eta zure dirdira

 ain zoragarriak dira.(Bis)

 3

 Nik zu aste egunetan,

 baserriko zelaietan;

 umil ta zintzo lanak egiten

 ikusten zaitut aietan,

 ta gero berriz jaietan

 erromeri alaietan.(Bis)

 4

 Lengo eaun batez dantzan,

 zurekin ibili nintzan;

 itzegin naita ezin itzegin

 oillo kokilduen gisan,

 ezer ezin nizun esan

 nerez lotsatia izan.(Bis)

 5

 Ez dezu naiko mutillik,

 ni bezalako zirtzillik;

 ezetz esango dezun beldurrez

 argaitik nago ixilik,

 lotsati eta umillik

 biotz miña ezin illik.(Bis)

 6

 Bart eziña det ametsa,

 poztu didana biotza;

 nere gogoa azaldu eta

 eman didazu baietza,

 lotan nintzan aberatsa

 esnatu dana utsa.(Bis)

 7

 Orra zer amets goxoa,

 eskutan neukan uxoa;

 baldin egitan gertatu balitz

 nere zorion osoa,

 baiñan bere arazoa

 gezurretako pausoa.(Bis)

 8

 Zure irudi laztana,

 nere pentsamentu dana;

 amodiozko espiritu bat

 barruan sortu didana,

 baiñan ikusten didana

 ezin eskura, au lana! (Bis)

 9

 Arrosa miragarria,

 kolorez txuri-gorria;

 neguan ere iltzen etzeran

 loretxo zoragarria,

 zuri begira jarria

 nago errukigarria.(Bis)

 10

 Zu niganatu eziña,

 biotzean daukat miña;

 Nere oñaze au joango litzake

 zu neretzako baziña;

 neskatxa maite birjiña

 NORENTZAT ZERA EGIÑA?(Bis)