Larralde'ko Madalena'ri
Otaño, P.M.
1
Franzes euskeran itz egiten dan
mendi tantayen artian,
Sara deritzan odei kutun bat
dago ibartxo batian.
Erri leyal au nabaitutzen da
gure kondaira maitian,
irakurriyaz edo entzunaz
zer gertazan jakitian,
milla zortzireun eta
amabigarren urtian.
2
Erriya artako aingerutxo bat
Larraldeko Madalena,
zan amazazpi urte besterik
artian etzituana;
guraso onak eska lezaken
alabarik leyalena,
ikusirikan erriya artan
apaizik etzeguana,
konfesatziagatikan sartu
zan Españiyan barrena.
3
Fediagatik joan da egondu
zan Nafarruko Bera'n,
an konfesatu eta gajua
etxerako etorreran.
Españiya eta Franziya nola
zeuden gudan edo gerran,
katiatuta gelditu zuten
bere erriko sarreran,
eta Kottadak ziyon:-Ez dakit
zertan gaizki egin dedan.
4
Ibilli izan bailitz bezala
ispi edo zelatari,
aur maite ura gaitzik sekulan
egin gabia iñori.
Agertu bear izan ziyoten
Fiñer buruzariyari,
ark bereala agindu zuan
gillotina jaso bedi,
eta lepua kendu bezayo
Madalena Larralderi.
5
Arrano zarren atzaparretan
mantxa gabeko usua,
illtzana bezala gelditu zuten
¡ai Madalena gajua.
Agintariyen buruzariya
izanik errukitsua,
esaten ziyon:-Uka ezazu
gaur emandako pausua,
erantzun ziyon:-Ez det egingo
ni juramentu falsua.
6
Jesus maitiak gogoz bidia
igaro zuan modura,
barkaziyua ta naitasuna
banatuaz ingurura.
Salbe Rejina kantatuaz da
begiratuaz zerura,
gillotinara igo ta ill zuten
zoragarrizko aur ura,
ta aingeruak eramana da
Santuen bizi lekura.