Aita semeak
Otaño, Pedro Mari
Lagundurikan denoi
gugatik il zanak,
seme, azi zaitugu
aitak eta amak,
beti zure gidari
izandu geranak.
Orain Gurutze onen
oiñean esanak,
ondo goguan artu
biaituzu danak.
Zu Ameriketara
joatia emendik,
Jaunak ala nai badu,
zer egingo det nik?
An ez dezu izango
aitik eta amik;
baiña etzera galduko
noranaira joanik,
ez bazaizu aztutzen.
gaur emen esanik
Gorde zazu buruan
eta biotzean,
aitak zer esan zizun
onuntz laguntzean,
bitarteko arturik
Jesus Gurutzean:
Jaungoikua t'ait'amak
batek aztutzean,
ez leike ondo izan
denbora luzean.
Ez nizuke utziko
joaten, egiyetan,
gure erlijiyua
ez balitz an bertan
Iritsiko baziña
ain urrutiyetan,
erri ta eleizarik
ez dan tokiyetan,
oroi zaitez Jainkoaz
leku gaztiyetan.
Seme, izan goguan
zere gurasuak
eta uzten dituzun
senide gozuak;
jayo ziñan tokiko
mendi ta basuak,
euskerazko otoitzak
edo errezuak,
erakutsiyak zure
amatxo gaixuak.
Iritxi da orduba
Juan bear dezuna,
badakizu ait'amak
emen dauzkatzuna;
ez dezazula aztu
gaur neri entzuna.
Itz baterako au da,
eskatzen zaizuna:
Izan zaitez nonnai ta
beti euskalduna!
|