Nere barrengo larritasuna

Amantzi

 -1-

 Nere barrengo larritasuna

 lasatu nai det aurrena

 esanaz emen «Amasa» dala

 tokirikan politena,

 Ain tontor zoragarria zera

 gaur ezin egin leikena

 orrengatikan zu, neretzako

 zera txokorik maitena.

 -2-

 Danon jabeak zu egin ziñun

 baxtarrik ederrenean

 baso, soroak, belaz errekak

 dituzula aldamenean,

 karaitz biziko mendi ortara

 iñoiz joaten geranean

 eguzkiak jotzen du gozoro

 iparrikan eztanean.

 -3-

 Billabonako erriak beti

 izango zaitu guraso

 jatorriz goian arkitzen zera

 eztaukagu zertan jaso.

 Ain zarra zera, zere garaitan

 artua ainbat eraso

 bañan alare beti indartzu

 bizi zera gozo-gozo.

 -4-

 Leku aizetsu osasuntzua

 eztago zure berdiñik

 ludi ontako bost egaletan

 zu, bezelako ixkiñik,

 toki obeak izango dira

 ez ortarañoko piñik

 batzuek baietz diote baño

 nik eztet sinixten danik.

 -5-

 Gure aurreko aitona zarrak

 emanikan asiera

 aurten eun urte beteko dira

 jakiñan gañian gera,

 iturritxo bat ekarri zuten

 baso goinetik kalera

 iñork eztegu ur eder ori

 ekarriakin galera.

 -6-

 Urtean buru ikusten degu

 zer gauza egiña dagon

 auso lanean lan egiteko

 sesiorikan etzegon

 alkartasuna dan onena da

 onen zalantzan ez egon

 gaur ere pixkat badago baño

 orduan geiago zegon.