Gaur berri asko jakiten dira

Olea, Inozenzio

 -1-

 Gaur berri asko jakiten dira

 ta modu askotakoak,

 asko utsaren urrengo eta

 batzuek garrantzizkoak;

 oraiñ aldian datorzkigunak

 eztira nolanaikoak

 Unibersidade bat iritxi

 nai duala Gipuzkoak.

 -2-

 Guk Ikastegi orren utsuna

 nabaitzen degu prankotan,

 nai ta eziña onek sortzen du

 gaurko famili askotan.

 Gipuzkoako buruzagiak

 au dabilkite aotan,

 Agintari jaun auek ez daude

 ikusten degunez lotan.

 -3-

 Gure gaztedi maitagarria

 jarri da ikasketara

 baña oraindik bide luzea

 unibersidadetara;

 balio duten asko ta asko

 eziñ juan oietara

 orregatikan ikastegiak

 etorri bear bertara.

 -4-

 Poz aundirikan eztu ematen

 batzutan egi gordiñak

 ortik etortzen dira sarritan

 gure konpondu egiñak.

 Guziok Aita batenak gera

 ta danok berdiñ egiñak,

 orregatikan bear ditugu

 erosotasun berdiñak.

 -5-

 Zergatik bada erreztasunak

 gorde bakar batzuentzat?

 Tokamentuak izan bear du

 legez senide danentzat.

 Aukerak jartzen baldin badira

 saiatu nai dutenentzat,

 guztientzako onura eta

 kalterik ez iñorentzat.

 -6-

 Prestaera on bat baña zer du

 gaztediak obeago?

 Ikastegi nagusi orrek gaitz

 egiñ beldurrik eztago;

 len asko zuten aiek ez dute

 izango, ez, gutxiago

 baña len ezer etzeukatenak

 bai bizibide geiago.

 -7-

 Ikastegi au sortzen badegu

 guztiok poztu gindezke,

 gazteak bertan egingo dira

 gizon jakintsu ta asko.

 Beti burrukan ibilli gabe

 koska berdindu litezke.

 zuzentasunaren eske,

 besterik gabe makiñatxobat

 -8-

 Gaur Gipuzkoa eskola txikiz

 daukagu zerbait betea,

 au egi bat da baña naikoa

 ez izatea bestea.

 Gure zeruan nabaitzen degu

 oraindik argi trixtea,

 pena litzake ainbeste izar

 eguzki gabe uztea.

 -9-

 Indar guziak bateratu ta

 bildu agintariekiñ,

 gure premian baldin badaude

 ez ondotikan aldegiñ.

 Gipuzkoarrok oraiñ da garai

 ta eutsi pixuari piñ

 talentuaren izpirik ere

 alperrik galdu ezdediñ.

 -10-

 San Iñazio eta Elkano

 Legazpi ta Urdaneta,

 kondaira zear gure baratza

 olako lorez beteta.

 Geiago ere sortu ditezen

 indartu erakusketa,

 emango duan lurrak egoki

 ongarritu nai luke ta.

 -11-

 Gipuzkoaren alde fiñezan

 ari diran jaun guziak,

 atsedenikan gabe dauzka gaur

 gure premi ikusiak.

 Ordaindu bear ditu ederki

 oien lan eta auziak,

 gaur edo biar iritxiko dan

 Ikastegi Nagusiak.

 -12-

 Agintariok: Gaur dauzkatzuten

 kezkak gu pozten gaituzte.

 Bertso arlote auek ez baña

 oiek ondratzen zaituzte.

 Nekerik gabe ezin litezke

 jaso ainbat buruauste,

 baña eskertzen jakingo degu

 gipuzkoarrok, nik uste.