Bertsolari zaharrei

Uztapide

 -I-

 Egun alai bat ospatutzeko

 garai da gure artian,

 amasei bertsolari badira

 Euskalerriko partian

 irurogei-ta amar urtetik

 larogeira bitartian,

 omenajia egingo zaie

 danari egun batian.

 -II-

 Bat edo bestek izan lezazke

 larogei baño geiago,

 beste okerrik ez baldin bada

 konpondu eziñik ez dago,

 kantatutzeko ongi etorri

 ta guria egiña dago,

 bai, orain ogei-ta amar urteko

 sasoia baldin balego.

 -III-

 Simon Ibarra Bankan bizi da,

 ez da bertsolari eskasa,

 ta Aldabako semea dezu

 Prantzisko Maria Lasa,

 Jose Maria Mutuberria

 Eltzaburuko arraza,

 Mungiatarra Juan Ormaetxe,

 berdintzen ez da erraza.

 -IV-

 Pello Errotan billoba «Ondartza»

 ta erria Asteasu,

 Joxe Iñaxio urrustildarra

 zuk zer esaten didazu?

 Pello «Saikola» izenekua

 arruatarra zera zu,

 ta Itziarko seme jatorra

 nere maixua «Zubeltzu».

 -V-

 Klemente Ezkurdia Gorritin,

 erria da Elizondo,

 Muñoa, berriz, Bidanikoa

 Joxe Mari Aristondo,

 Patxi «Artxanberria» il zaigu

 gendukalakuan ondo,

 Zarauzko Nekazabal zartu da

 baña oraindikan sendo.

 -VI-

 Aristimuño Segurakua

 Donostira otsegiña,

 Tomas Arrizabalaga, berriz,

 zumarragatar bat piña,

 Lorentzo Zulaika ori ere

 Elgoibartar atsegiña,

 guztien ezaguna dezute

 erri bereko «Etxegiña».

 -VII-

 Memoriz ongi arkitzen dira,

 ankak piska bat makaldu.

 Ainbeste urte dauzkan gizonak

 arrazoirikan ez al du.

 Egun eder bat igarotzeko

 itxaropenik ez galdu,

 orretarako egun orretan

 Donostiara azaldu.

 -VIII-

 Bat Bankan bizi da ta bestea

 Bermeoko muturrian,

 oriek alkar ikusitzeko

 ez dira oso urrian,

 egun orretan naitaez alkar

 ezagutu bearrian,

 batek bestia besarkatuaz

 lasaitasun ederrian.

 -IX-

 Oraingo bertsolari gaztiak

 or dabiltz erririk erri,

 orregatikan jakiten dute

 geienak alkarren berri.

 Zarrak olako aukerarikan

 etzuten izango sarri,

 gaztiak alkar ezagutzera

 Donostiara etorri.

 -X-

 Urte batzuek juan dirala-ta

 zertako egon tristiak,

 orain aitondu zerate baña

 lenago izanak gaztiak,

 poza ematen zuen orduan

 nunai bertsotan astiak,

 zuek kantatzen ez badezute

 badira orain bestiak.

 -XI-

 Euskalerriak bertsolariak

 ematen ditu danian,

 batere iñork agindu gabe

 asiko dira lanian,

 oiekin ere etzan atsegin

 len gaztiak ziranian,

 naiz ta piska bat orain makaldi

 zartzen asi diranian.

 -XII-

 Bizimoduak izaten ditu

 une batzuek grabiak,

 beste batzutan, berriz, ederki

 beroturikan labiak.

 Bertsolari zar auek dirade

 urte askoren jabiak,

 Euskalerrian sortu ta bizi

 ta alkar ikusi gabiak.

 -XIII-

 Zartu dalako izan dezake

 batek kantatu eziña,

 len sasoi ona zeguanian

 etzuan usteko baiña,

 lenago bazan indarra eta

 gizona ere bikaiña,

 altu bajuak daude munduan

 etzera orduko tamaiña.

 -XIV-

 Illiak ere gutxitu dira

 eta burua arindu,

 orain bertsua kantatutzeko

 zertako alperrik agindu,

 batek balio ez duanian

 ez diteke alegindu,

 ni zuek baño gaztiago naiz

 baño neriak egin du.