Pelota eta ni
Oiarbide
-I-
Ez naiz bertsolaria,
ez dakit bertsotan.
Baina badakit ondo
jokatzen pelotan.
Beraz, nabil bertsoak
jartzeko asmotan,
pelotan egin bait dut
bizitzan askotan.
-II-
Eskolara joatean
beti arkupetan
ibili ohi nintzen
izerdi patsetan.
Gastu ederrik egin
nun alpargatetan,
eta amaika tanto
lapurtu tranpetan.
-III-
Gogoan dudalarik
zu zara aurrena,
jolas guztietan nik
ikasi nuena.
Geroztikan didazu
gaztetu barrena.
Zu utziko zaitut nik
jokotan azkena.
-IV-
O pelota! zu zara
lagunik onena,
zuk kendu dizkidazu
amaikatxo pena.
Bakardadean zinen
nere atsedena,
lagunartean berriz,
nere zoramena.
-V-
Txiki txikitatikan
herriko frontona
izan zen neretzako
lehenen katona:
hortxe bihurtu nintzen
ni plazagizona.
Horregatik damaizut
nere esker ona.
-VI-
Ez badirudi ere,
oso lotsatia
naiz ni jaiotzatikan,
eta bakartia.
Zuk sortu duzu nigan
bai lagunartia.
Nere ondoan beti
bizitu zaitia.
-VII-
Gizona, ezin zara
bakarrikan bizi,
bakardadea bait du
gizonak minbizi.
Pelotak uxa zidan
gaitz hori lenbizi.
Lagunartea gorde
neri beti bizi.
-VIII-
Nik ez zaitut utziko
bide bazterrean,
zuk uzten ez banauzu
zure haserrean.
Lagun eidazu neri
bizitz bakarrean,
aurkitutzen naiz eta
zure beharrean.
|