Bankaren irabaziak
Murua, Iņaki
1
Azpitik dabil hatzapar beltza
hain mandatari isila
interesaren morroi leiala
inori kentzen habila
gure diruaz egiten dute
milaka miloien pila
eta fusio hauekin doaz
askoz gehiagoren bila
2
Europan dauden bankuek dute
indarra eta kemena
hauek diote: gurea berriz
horienaren laurdena
txikiak batu indar daitezen
irtenbide hoberena
gutxi ajola hau izan arren
txikiagoen kondena
3
Bide hontatik laister bakarra
lehen lau ziren lekuan
eta jakina ahulena galtzen
gisa hontako tratuan
berdintasunik ez da ernaltzen
diru goseen jokuan
aurki hemengo ondasun denak
inperialisten sakuan
4
Ta langileak? zenbat lanpostu
galduko zaizkigu deman?
ahaztu hori, ba al dakizu
negozio hau zenbat dan?
bota kalera sobra daudenak
lau-bost txajur haundi eman
horra zer geran langileria
kapitalisten sisteman
5
Bi zuzendari zeuden tokian
bakarra da bat eginik!
bai, baina hoiek dena daukate
jaun eta jabe izanik
ta langilea bizirik dago
ez zer jan eta ez lanik
esklabu batek nola ez daukan
erantzuteko baimenik
6
Lehen urratsa gure herrian
orain gutxi gertatua
hori dela ta jende asko da
kezketan barneratua
Lankide Aurrezki bat badaukagu
Euskal Herriko frutua
kooperatiben geroa zein da?
hor dago orain kontua
7
Diruetxeak bateratzean
irabaziak ugaldu
Euskal Herrian inbertitzeko
asmorik inork ba al du?
zer da helburu, Euskal Herria Europan
zehar zabaldu
edo emaitza bakarra dugu
lanpostu mordo bat galdu?
8
Diferentziak ugalduz doaz
nola ez nabari minik
lagun urkoa etsipenetan
intziriz bizi ezinik
bihotzak ez du pentsamentuen
eremuan zer eginik
dirua bada jaungoiko bakar
ez daukagu zereginik