Asi baño len agur bero bat
Mujika, Xabier
-1-
Asi baño len agur bero bat
zuri, Santiago Zabala,
zure bertsoei eman nai diet
nere erantzun apala.
Mamizko ziran zure bertsoak,
an etzan dana azala,
orregatikan esaten dizut
bertsolari on zerala.
-2-
Letu nituan zure bertsoak
orain dala iru aste,
eta pakerik eztet laguna
erantzuna eman arte.
Eskabidea ba-det nik ere
naiz oraindik izan gazte,
orretxegatik arazo ontan
artu nai det orain parte.
-3-
Esaten zendun: Illargiari
faborez exilik utzi,
konforme ez nago ta orregatikan
emango det nik iritzi.
Naiz zalla izan eginkizun au
eztezagun iñoiz etsi,
izango baita gure ateak
aurrerapenari itxi.
-4-
Danok dakigu eriotz batzuk
dirala negargarriak,
ala ta guziz guk nola utzi
asi ditugun bidiak.
Bera pakean izan baño len
auxe nai du illargiak,
gizonezkoak ken ditzatela
Viet-Nam'etik gudariak.
-5-
Bear aundiak dira munduan,
au eztago ukatzerik,
baña argatik aurrerapenak
eztaukagu baztertzerik.
Gose daudenen alde oiu bat
egin dezagun barrutik,
eztegula nai gure munduan
guda-tresnaren gasturik.
-6-
Amabosgarren gizaldiz ere
ba-gendun zer konpondua,
gizon bateri esan zioten
galdurik zula burua.
Ala ta guziz zearkatu zun
beldur gabe itxasua,
Amerikara iritxi zan da
orain degu famatua.
-7-
Egun batean gure Elkano
igo zan itxas-ontzira,
arrixku artan etzuan izan
bere buruan kupira.
Berak egin zun lenengo aldiz
mundu osoaren jira,
jira artatik irabaziak
mundura etorri dira.
-8-
Ai, arrixkuak bear ditugu,
ala deritzait, laguna,
gizasemeak lege ori du
beldurtuko ez gaituna.
Gure mundu au konpondutzeko
auxe da bear deguna:
Leku guzitan guk agertzea
gizon danei maitasuna.
-9-
Ejenplo bidez esango dizut
ia ez dan arrixkua,
baserritarrak obrak egiten
gastatzen duten dirua.
Baña diru ori, danok dakigu
eztala galdutakua,
obra oien bidez baserritarra
aurreratzen baitijua.
-10-
Nere iritziz ekin bear degu
illargiratu artian,
munduarentzat ezta kalterik
juten bagera pakian.
Al dan arrixku gutxienakin
gauzak egiñaz neurrian,
jakin dezagun gutza't gauz onak
ba-dirala Illargian.
