Urepel'eko "Xalbador"-i
Mujika, Teodoro
-1-
Mugaz aruztik bizi zeraden
Urepel'eko «Xalbador»,
gaur ez gatozti txistuak joaz,
gaur ez gatozti saltakor.
Sinista zazu pekatu ura
aitortzen zaizula jator,
ta erruaren barkapen eske
biotz apaldu bat dator.
-II-
Izkeraz alde aundia dago
zureagandik gurera,
jakiña, zure esanai askoz
ezin konturatu gera.
Beraz itxuan pausoak nola
bota genitun aurrea?
orregatikan ainbat iritzi
erori ziran lurrera.
-III-
Zalapartazko burrundik gabe
patxaraz eta geldiro,
zure bertsoak irakurri, ta
aztertu dira berriro.
Eta «Xalbador» ikusten degu
ongi baño obekigo,
malla ortara etziñala zu
meriturik gabe igo.
-IV-
Une batean zure aurrean
sortu zan giro sastarra,
paketutzeko zu izan ziñan
gizon argi ta azkarra.
Bertso batean irten zitzaizun
itz eztitsu bat bakarra,
eta arretxek itzaldu zuan
ango porrusta zakarra.
-V-
Euskalerria maitasunean
iñoiz eztedin atzendu,
zure biotzak gurearentzat
ikasbidea jartzen du.
Egin genduan okerra errez
ezin ziteken zuzendu,
gure antzeko biotz kaxkarra
agertu izan bazendu.
-VI-
Askorengandik naiz esker txarra
beste gauzarik entzun ez,
zitalkerizko purrusta gabe
erantzun zinguzun onez.
Beraz, «Xalbador», ikasgai ontan
erakusten diguzunez,
indarrez ezin diteken asko
diteke goimaitasunez.