Orixe oroituz
Mujika, Luis Mari
Erdi giputz, erdi nafar,
maite izan duzu gure herri,
bertso sendoen egile
(hitzez soil, arimaz eri)
lelo gozoen andanan
kantatu eme Euskal Herri,
mistika eta fedea
"Barne-Muinetan" miretsi
(ah, aintzina egungoaz
etentzea ezin etsi),
amona Mariaxintxi-k
zinduan euskaran hezi,
hau onartu, bestea utzi,
hangoa, berriz, ezetsi
berrikeriei, batzutan,
mila arbuio zuk ta gezi,
Uitzi-n ta Orexaldean
ondu zenuen poesi,
hutsa, argia, sinismena
mintzo izkutuetan senti,
euskara damaren zale
-herria ere maitemin-
beste guztiak utziaz
osatu ezkontza berri,
San Joan Gurutzekoa,
Teresa, Frai Luis (besterik?)
zure mintzagai garaien
neurri ta lagunkide egin,
joan zinen euskal hatsa
itzaltzea ikustezin,
oraina eta geroa
beude betiro zurekin!
|