Esna adi, txoriño
Muxika, Luis
Ernai, ernai,
ene txori...!
Deika zegok
olerkari!
Olerki-musa-txoriño,
zer dagizu ixillean
txor-txor ezti kanta barik
goi-irudimen nerean?
Zure abots marmariña
ez dantzut ez aspaldian;
ba-dut kezka ote zeuden
nerekin ba aserrean...
Udaberriko polit-xoil
zure abesgarri,
amets-lilluraetan bait
zeukaten ba olerkari.
Orain, orde, duzu ia
itxi moku polit ori,
t'orregatik nik biotza
emana bai tristurari...!
Esna ta jeiki, eneño,
ta abestu biotzari,
maitasunezko jario
jori-xamurño bai dari
abots kuttun zureak
biotz minberati oni,
bigunki dana utziaz
atsegin-irriz ler zori...!
Ernai, ernai,
ene txori...
Deika zegok
olerkari!
|