Ezkio'ko gaiaz... ara besteak
Luistar
Goitiko agerketak
dirala Elizak
aitortzen dituenak...
ayetxek zuzenak.
Berak baieztu arte
erraz sinisteak,
ez ditu gutxi sortzen
naste ta kalteak.
Agurtza esatea
sarri ta zaleki,
non-nai txit ona dala
edozeñek daki.
Otoitza txorakeriz
naspiltzea gaizki
dala ere, ordea,
ziurtzat iduki.
Sorginkeri tankera
daukaten joerak,
ez al-dira batzuen
era ta esanak?
Ala dirudite ta
gure zentzu danak...
zuzen ibiltzen lagun
deigula Goi-Jaunak!
Goiko Ama aotan
¡ez dakit nik nola!...
ongi dakigu batzuk
ibiltzen dutela.
Ez dabiltzala nago
Amak nai bezela...
Goiko argiz ¡itxuak!
argitu ditzala.
Ama Birjiña emen
agertuko balitz,
ez litzake esango
oinbeste txoro-itz.
Okerrak sinistuta
batzuek or dabiltz,
eta nai ez dutela
zuzentzea da gaitz.
Jesus'en Ama'k ez du
esan itz alperrik,
oraindik gutxiago
oker da gezurrik.
Ikusle edo diran
batzuek bederik,
esan dituzte baña
naiko sorginkerik.
Erraz sinisten duten
onen babesean,
¿gaiztoak ote dabiltz
azpitik lanean?
Gauza ez det ikusten
itxura onean,
diot, ote dijoan
sinismen kaltean!
Gezurrak sinistuaz
egiak zalantzan
dauzkaten norbaitzuk
ia ote dabiltzan.
Egien iturria
daukagu Elizan,
bañan gezurrak sarri
ludi gezurtian.
Elizak esan arte
"sinistu diteke",
erraz ez sinistea
guk obe genuke.
Ludi gezurti onek
salduko lituzke,
gezur kaltegarriak
ugari ta merke.
Sinismenean lendik
epel dabiltzanak,
oztu ta okertzeko
oraingo egunak.
Sorotik kendu gabe
barrabas belarrak,
ez dira indartuko
iñoiz galburuak!
|