Luistar
Beste txoriak ixildu ondoren
txantxangorria abesten,
udazkenean gure atarian
poz-pozik degu ikusten.
Gure-gurea degun txori au
guztiok degu maitatzen,
elur t'ekaitza datozenean
etxera xaigu etortzen.
***
Orain artean ibili ditun
moskor guztietan txarrena,
"Baldatxo"n ustez izan bear du
ankan miñ eman diona.
Ori baño ere, txarragoa da, ba,
ardoak sortzen duena,
bizia-egurrak galdu lezake
t'ardoak berriz ¡gizona!
Ez iñork esan gizona dala
iltzen danean bukatzen,
baizikan gera ludi ontatik
betiraundera aldatzen.
Obenik gabe iltzen diranak
zerua dute arkitzen,
t'oben larrian dijoan moskorra
beti inpernuan erretzen.
***
Zumarraga'ra lengo igandez
ez nuan izan joaterik,
nai dan guztian ez baita izaten
egitekoak uzterik.
Beragatikan iritxi nitzan
biotzez bakar-bakarrik,
ez esan, bada, ara joateko
ez nedukala gogorik.