Zelaian erdira
Emiliano Mujika
Naiz arpegian izan
bakoitzak bi begi
alkar ondo ikusteko
ez dira geiegi;
baña mingain bakarra
da gezur muttegi,
eta gezurra dana
ezin izan egi.
Egi guziak beti
esan ez litezke
baña bai dagonean
gezurra lots eske.
Ajola utzi bezin
lotsa balitz merke
arpegian bi azal
izango giñuzke.
Badira badutenak
bigarren azala
¿baña zeñek ez daki
ezagutzen dala?...
Bi azal baño obe da
kopeta zabala,
¡t'au ezin izan, danak
gezurti zitala!
Ajolaz argal eta
zima txarrez gizen
gizonaren izenik
ez da or gelditzen;
aldatu dezakegu
beste zerbait izen...
¡baña bitarte doaz
illeak zuritzen!
¿Esanaz ez daukagu
buru zuri naia
griñak ondo zaintzeko
badala garaia?...
Ez da iñun egongo
datorren amaia,
t'ara or aurrez aurre
Josafat zelaia.
Orain iritxi gabez
Jaunaren kupira
¡zer arpegian ordun
alkarri begira!
Emengo egintzak an
azalduko dira
estalgarririk gabe
zelaian erdira.
|