Ekaitza
Emiliano Mujika
Udazkeneko aize biziak
astinduz ego zatarrak
apalki zegon itxasoari
arro dizkio kalparrak,
eta barrendik irten ezkero
berezko ditun indarrak
asarretzean badarizkio
purrustaraldi zakarrak.
Urdin urdin zan iparraldea
begira zeñen ubela,
laño mordoak pillan gañezka
tximista dariotela.
Ustu nai dute itxasoaren
aseta dagon sabela,
orren bizi ta orren durduri
ezin etorri bestela.
Laño beltz oyen itzal illuna
badator ere lurrera
itxas ertzeko zelaiak zear
baso ta mendiz aurrera;
tximistak diz diz, turmoyak burr burr...
kazkabar jasa gain bera...
gordeta dagon zulo beltzetik
neguak nai du atera.
¿Zein aizek ditu ostoak jaulki
t'adar igarrak iñausi?...
txistuka basoz baso doana
al du norbaitek ikusi?...
Aize guziak naspillatuta
or dabiltz alkar zeiñ ausi,
¡parra gordin, egoa zorrotz,
biyak nai dute nagusi.
Biyak burrukan kementsu datoz
aldagoiaren aurretik
biribillean goraz goraka
orbel igarra lurretik;
alde batetik bisutsa dala
turmoi orrua bestetik
jasa zaparrak asiera du
lañotutako aitzetik.
............................................
Zapuztu dira mendi aldeko
artzaitxoaren alaitzak,
orbelez lurra estali da ta
erantzi dira zuraitzak.
Udaran iñoiz arro baziran
galurreneko arkaitzak,
laño artean eskutatuaz
mendetzen ditu ekaitzak.