Bide ona
Emiliano Mujika
¿Zergatik zabiltz orren arduri
guzia bildu naiean?...
¿ez aldakizu lurreko dana
gelditzen dala lurrean?
Ezin ase dan zikoitzik iñun
ez da bizitzen pakean,
eta damua bezterik ez du
azken ordura danean.
Ar zazu beta gogoratzeko
zure egin bearrak zer diran;
alperrik zabiltz zorion billa,
iñun ez dugo ludian.
¿Biotza zerbait ase dizunik
izan al dezu agian?...
mendi basoan baleike zerbait...
ez dago beintzat erian.
Erriak dauzkan tortikak utzi
ta atoz nerekin mendira,
gogo begiak zabalduz ondo
zer agiri dan begira.
¿Ikusten dana nork egiña da?...
¿gizonak txiki ez dira?...
¡t'oraindik zaude biurtu gabe,
gezur bidetik egira!
Zeruruntz jaso begiak eta
damutu oker egiña,
nai ez badezu azken orduko
kaltez dan kezka samiña.
Gogapa onak arinduko du
asnas, larriko zotiña,
eta orduan eriotza da
lo bat dan bezin ariña.
Bildurgarria izan ez dedin
eriotzaren itzala
asmo zuzenak oker bidetik
urrutiratu zaitzala.
Zuk badakizu eskubirako
beste bide bat ba dala
¡ez da ordea nai dezun eta
uste dan bezin zabala!
Makurtu, dezun arrotazuna
gezurrezkoa dalako
arro gai danik iñor ez da ta
aizez puztuak bearko.
Griñak ezigaitz uzten ditunak
pillatzen ditu gaitz asko
eta gaur diran irri algarak
negar litezke bigarko.
Ona ta txarra nastuak dauden
bidetik joaten bazera
nai dan lekura iritxi gabe
geldi zindezke atzera.
Orduan ere naigoko dezu
derizkiotzun aldera,
baña sinistu, ezin dezula
izango beti aukera.
Gaitzik ez egin, urkoa maite,
lagundu bear danari,
t'egin bearrak ondo beteaz
jarraitu zere lanari.
Bide ortatik okertu gabe
t'esker egiñaz Jaunari
lurreko baño esker obeak
zerutik datoz ugari.
Ori guzia esaten digu
aingeru begiraleak
griñan ezi ta onbidetuaz
izan gaitezen obeak.
Baña guk beti zabal zabalik
griña zirtzillen ateak;
eta gaizkerik urratu gabe
¿nola iraungo du pakeak?