Bakearen iguzkia
Moulier, Jules (Oxobi)
1
Bakearen iguzkiak
Argituko duenean,
Ikus gitzala jeikiak
Zerurat zorionean
Oro eskerrak igortzen ari...
Bekatuen urrikiak
Zuzendu gintuenean,
Ezin altxatuz begiak,
Zorigaitzaren menean
Hel-ka ginauden Gainekoari.
2
Bakearen iguzkiak,
Elizarako bidean,
Xuka ditzala begiak,
Amen begiak gordean
Oraino ere nigarrez ari.
Sendarazteko zauriak,
Amak, zuen bihotzetan,
Biltzeko hilen sariak,
Hurbil zaizte otoitzetan
Kurutze-pean dagon Amari.
3
Bakearen iguzkiak
Alargunduen etxetan
Argi ditzala begiak,
Hor daudenak auhenetan
Ez diten eman etsitzeari...
Fededun emaztekiak,
Ez dautzue gutartean
Eskas eginen ogiak.
Beha, lanak egitean,
Nork mantzen duen geroari!
4
Bakearen iguzkiak,
Hedatuz nasai orotan
Bero ditzala ttipiak.
Zonbat haur gaixo frangotan
Aitaren galdez etzaizku ari!...
Hil zaizkote gidariak!
Jesusen ikaspenetan
Guk bil ditzagun argiak
Umezurtz hoien onetan,
Ihardesteko hilen deiari!
|