Agur Amerekitako Eskualduneri!
Oxobi
Nork erranen daut Eskualdun orok
zer odol dugun zainetan,
guzier zerek egiten daukun
«pil pil» noizpeit bihotzetan,
egun ederrez bagaudelarik
ardi zain mendi gainetan,
edo barnean, suari beha,
negu gau ilhun hotzetan?
Gutan nork ez du maiz edo behin
nahi borthitz bat senditu,
itsasoz handik heldu zen boza
duelarikan aditu...?
Herrian segur etcherik ez da
chutik oraino gelditu
nondik ez denik haur bat bederen
Amerikano jalgitu!
..................
Ikusi ditut lagun maiteak
Ameriketarat joaiten,
nigarrez, bainan beldurrik gabe
itsas untzirat igaiten...
Oi egun hetan bihotzak ichil
zoin nekez ziren egoiten!
Ama gaichoak nola zituzten
ondar musuak emaiten!!
Amon bihotzak argira zabal
orduan ikus bagintza,
ez ginezake guhaurek sinets
jasaiten duten min gaitza;
heien gogoak bethi geroztik
haurrekin airez dabiltza...
lagun ohiak, zuen aldetik,
atchik azkar ezagutza!
Etchean utzi ditutzuener
artetan igor berriak;
ez lotsa lanak baditu ere
gogortu zuen erhiak;
ama chaharrak maite dituzte
letretan hitzak larriak,
berek daiten eskuara garbiz
direnean ezarriak!
..................
Eskualdun haurrak, Ameriketan
erromes zinezten sartu,
bainan lanetik zirezte laster
gizon fierrak agertu!
Eskual Herri bat lur arrotzetan
horra nun den orai sortu,
zuen bidea horra don duten
bertze jendek nahi hartu!
Erroak barna sartuz geroztiK,
haitza bere hartan behar
zabal eta chut handitzekotan
beira dezan hitaz indar;
adichkideak, etchean ukan
irakaspen zuzenak har,
makurrik gabe, hor ibiltzekotz
egun bezain ontsa bihar.
...Gu berechteko zerbait diren
itsaso, leihor, ibaiak?
anaitasuna nondik dezake
galaraz itsas handiak??
Ez... Eskualdunak Eskualdun gauden
guziz elgar atchikiak,
Frantzian orduz nola baikinen,
Ameriketan anaiak!
Goraki beraz nahi dut erran
agur, agur Eskualdunak
danzari lerden, airos kantari,
nik ezin ahantz lagunak!
Oi! nahiago zinuzkete ba
haurriden musu lagunak,
bainan gogotik onhartkitzue
nere bertsu bihozdunak!!