Ohean nago eta, horra hor aitortza
Mendizabal, Mikel
1
Ohean nago eta, horra hor aitortza
Bizi hauxe gehiago ezin dut goza
Arrantzale izan naiz langintza zorrotza
Ohean gelditzea da benetan motza
Urruti dut poza
Trixte dut bihotza
Penaren morrontza
Negarrez entzuten dut olatu otsa.
2
Itsasoan ibili nintzen errespetoz
Bertantxe saiatuz ni indar oroz
Orai ohean nago ez daukat hainbat poz
Begiraka hor nago sentimendun gogoz
Olatuak datoz
Dira nere bihotz
Ta hemen nago motz
Berriro itsasora joateko asmoz.
3
Itsasoko bizitza hain da arlotea
Berak eskeini zidan bizi atea
Bainan orain ezin dut, neretzat kaltea
Penagarri da noski hola egotea
Beti da epea
Buka da nekea
Arrixkuz betea
Agur nai dezun arte itsas maitea.