|
Bertsolaritzak gerorik bai?
Mendizabal, Mikel
1
Bertsolaritza ez da
tenore geldoa
arrastoan aurrera
aurrera arrastoan
beldur gabe doa.
Orain ondoren dator
betiko leloa:
zer eta nolakoa
nolakoa eta zer
da bere geroa?
2
Beste modu batera
izan zen lehena
hauxe da gaur zenbaitek
zenbaitek gaur hauxe da
esaten duena
aldatu da bizitza
eta giro dena
hartuta segi zagun
segi zagun hartuta
tokatzen den trena
3
Lehengo bertso seaskak
ziren baserriak
orain indartu dira
indartu dira orain
kale ta herriak.
Ase nahi baditugu
gaurko egarriak
eskaletan horra hor
horra hor eskaletan
iturri berriak
4
Hitzarekin jolastuz
neska ta mutiko
kantari ari dira
ari dira kantari
kopeta argiko.
Neurtuz rimatzea
dutenak begiko
ahots hau gero ez da
gero ez da ahots hau
gaizki etorriko
5
Bertsolaritza bada
hitzaren kirola
hizkuntzari laguntza
laguntza hizkuntzari
egin dezaiola.
Bat adarra da eta
bestea arbola
berdina dute biek
biek berdina dute
izerdi-odola
6
Itsatsi behar dira
erro bereziak
arbolak xurgatzeko
xurgatzeko arbolak
hezegai biziak.
Berde irauten badu
enbor nagusiak
hostoz jantziko dira
jantziko dira hostoz
adaxka guziak
7
Euskararen giroaz
kezkati gaude gu
zaletasunak zerbait
zerbait zaletasunak
halare erne du
hizkuntzaren kakoa
zuzentzen badegu
geroko garaipena
garaipena geroko
kanta dezakegu
8
Bertsolari ta bertso-
zaleen artetik
Elkarte bat badugu
badugu Elkarte bat
iazko urtetik.
Hartu makila eta
itzeituz aurretik
gurdi hau sar dezagun
sar dezagun gurdi hau
behar den atetik
9
Pernando eta Bilintx
Pello ta Xenpelar
gaur berritzen ditugu
berritzen ditugu gaur
hainbat izen edar.
Gaur egungo izenik
ez da aipa behar
geroak egin beza
egin beza geroak
gauza hori bihar
10
Poz-saminak idatzi
ta gogoz abestu
txapelketak tajutu
tajutu txapelketak
saioak zehaztu
publikoa gozatu
giroa ez hoztu
orainaren geroa
geroaren oraina
dago gure esku
|
