Udaberria
Mendizabal
Negu beltzetik atara eta
udaberrin sartu gora
nolakoa izango ote den
hori da gure galdera
haro zoragarria
zera udaberrin
arnas berri baten era
bizi berrien jaiotza eta
hildakoen piztuera
"Udaberria, bizi berria"
esaerarik justuna
xuspertu eta berpistutzeko
neguko giro astuna
hazi berrin eraile
estalgarri emaile
inongo lotsik ez duna
landare danentzat nehurriko
jantziak ditun jostuna
Artu dituzun eginkizunez
beti zera zentzuduna
geroko fruto eta emaitzen
jaurlaritzea dezuna
ama on baten antza
hortan badezu lotza
Zainduaz etorkizuna
landarek sortu, apaintsu jantzi
eta azten dituzuna
Ama baten irudia eta
eginkizuna daukala
izadiarentzako sinetsi
guraso on bat zerala
landareak bizitza
eta bere emaitza
zure babesen duala
esan liteke guztiak zure
seme -alabak dirala-.
Zuzen etortzen baldin bazera
bada alderdi zehatza
kanpo guztia aztoraturik
badu sua eta gatza
zure huta-egiteak:
"neke eta kalteak"
udazkenak daramatza
urteak ditun goraberatan
zu, zera denen ardatza
Gizaldiak, ere haurtzaroan
du mundura jatorria
orduan dugu udaberria
eta indar etorria
pasa dira urteak
aldatu gizarteak
heldu da garai berria
haurtzaroa buka zaigu eta
joan zaigu udaberria
Egaztiak, kabiak agiten
abestiak, dariola
udaberriko egun sentían
hoiek daukate eskola
baina aspaldi hotan
dabiltz bere asmotan
etsaiak, hainbat kaiola
hola, egizko udaberriarik
ez da izango inola
Egan ibili behar zutenak
honen beste hertsidura
udaberriko egun sentia
norentzako agertu da?
txori kailatuak
"eta horrelakuak"
datoztenan burura
udaberriak hartzen du berriz
negu beltzaren itxura
Txoriak egan, gizonak oinez
ez, gaurko bide latzetan
ehiztarien bildurrik gabe
pakezko esperantzetan
orduan izango da
udaberri denbora
mendi, kale, ta etxetan
surten etorri ez dena baina,
daukaguna ametsetan.
Udaberri horren zai dago
gure herri euskalduna
negu guztian amets batean:
noiz dugu argitasuna?
itxaropen babesak
loreztatu amesak
gertutu ale biguna
udazkenean egin dezagun
fruto horren bilduma.
