Ene andregai zena
Mendiburu
Uste gabean etorri zauta, galtzeko berri trixtea
nihauri erran, behar zutenez, neke baitzen erraitea...
Oto ixtripuz kolpatua da, zure andregai gaztea...
ihardetsi dut, grazia duta, bizi deno ikustea?
Ordu berean, ikusi ditut, beren begiak apalik
ohartu ere, ez zuketela, ihardesteko ahalik
ez da sekulan, nitara jautsi, hau bezalako itzalik
bien oinetan, erori nintzan, lurrera zabal zabalik.
Ez dakit nola, ereman nauten, otoz ala besoetan
ez baitakigu, nun eta nola, gabiltzan holakoetan
Dakitana da, lehen solasa, zure ganberako bortan
nahi nukela, ni ere hila banintz zure ondo hortan.
Oren trixteak, lotsagarriak, denentzat latzaren latza
kolpatua dut, uspelkatua, haundizki nere bihotza
ikusten eta, hunkitzen ere, dut maitearen gorputza
transiarazten, baizik ez bainau, baita beti berdin hotza.
Haren aitama, haurride eta, guziak umil umilak
ezinbertzean, ezin jasanez, ez gaude ixil ixilak
bihotz urratzen, gelditu gabe, entzuten dira ezkilak
Gure bihotzen, joiteko aski, ez direa gure hilak?
Lau mutil gazte, etorri ziren, banak galtza xurietan
horiek ere, denak bezala, mokanesak eskuetan
jende guziak, zahar ta gazte, nigarrez zure oinetan
zure etxetik, ateratzean, bederatzi orenetan.
Ordu berean, hasi baitira, urruriaka zakurrak
horiek ere, beren gisako, dituzten azken agurrak
ez baitituzte, urruriaka, eztitzen gure nigarrak
espos arropa xurien partez, estaliko zaitu lurrak.
Bizia utzi, eta gorputzez ere dugu utzi behar
erraiten ahal ez den gauza da, betikotz uztea elgar
egi da dudarik, hil harrietan, izanen zera zu behar
hil eta zure tonba berean, nezatela otoi ezar.
Hogei eta bat garren urtean, ez zinuela betea
etsigarri da, zinez neretzat, zure betikotz joaitea
hobe litake, memento huntan, batere ez izaitea
lazgarri baita, zu nere bixtan, hil harrietan uztea.
Zure ondorat, tonba begirat, jinen naiz egun guziez
zurekin solas egin beharrez, eta zuretzat otoitzez
zeren betikotz, elgar utzia, badugu ere gorputzez
ez dugu nehoiz elgar utziko, arimaz eta bihotzez.
Nere begiak, malkoz beterik, hemen naiz umil umila
ez da hiltzerik, bi bizi dira, maitea ez zira hila
Jainko maitea, lehen bai lehen, etor zaite nere bila
lurrean egin ez den ezkontza, zeruan egin dadila.