Martchant bati
Mehaineko buhami bat
1
Martchanta Yauna, egia maite baduzu,
Atentzionez, othoi, entzun nezazu.
Sinhetsi nahi banauzu, hobeki muntatu behauzu,
Irabazi gehiago atherako baituzu.
2
Ez dut ikhusten nihon zu bezalakorik,
Bazter orotan zaude famaturik;
Gauza bat falta bakharrik, zaldi on bat behar nombeitik,
Bertze tresna zahar hori igortzeko etchetik.
3
Ibili gabe bidean uda ala negu,
Baluke horrek oihanean emplegu;
Larrerat yoan behar badu, ferrak khentzen ahal diozkagu,
Gaztetuko da menturaz libro uzten badugu.
4
Nahi baduzu entzun garbiki egia,
Hartu behauzu zaldi gazte berria;
Zahar huni guardia, fini baitu bere aldia,
Emozu ahantzi gabe erretreta handia.
5
Lehen bai lehen kurri, ikhus merkatua,
Ez egon hemen tresna horri lotua;
Moltsatik larga dirua, egin ontsa zure tratua,
Behingotz izan zaitezen gostura muntatua.
6
Martchanta Yauna, bethi zure zerbitzari,
Attention nere azken hitzari;
Lot zaite zaldi onari, eta estal karrosa hori,
Fortuna jarraikiko da zure muntadurari!
7
Segi nezazu, nik erran bezala planta;
Entzunen duzu laudoriozko kanta:
Ah! zer gizon galanta! Zer muntadura charmanta!
Orotan eginen dute: Biba, biba martchanta!!
8
Gogoan orai phertsu haukien morala,
Egin nio, bai, zuk diozun bezala,
Balin banu ahala, bainan eskas dut metala;
Lagundu nahi nauenak, othoi eman dezala!