Zorioneko futbola
Matxain
-I-
Bertso auetxek irakurtzean
burutik joana nagola
bakar batzuek esanda ere
ez dit batere ajola;
beingoagatik aitatuko det
zorioneko futbola,
gaur badirudi beste problemik
Españian ez dagola.
-II-
Futbola izan da egun auetan
periodikuen izkuntza,
eguneroko ogia nunbait
ortik etorri onuntza;
Yugoslabia genduen aurka,
guk galdu bat eta utsa.
Oraingo ontan faltatu zaigu
Jaungoikoaren laguntza.
-III-
Zentzu pixka bat duan guziak
futbola zer dan badaki;
jendea zerbait distraitu ta
dirua bildu galanki.
Garai batetik aldatu dira
ementxe gauzak ederki,
deporte utsa lenago zana
gaur milla gauzen tapaki.
-IV-
Egia esan ni ez nator bat
gaur emen dabillen modaz.
Modak bezela au ere noski
aldatuko da denboraz.
Milloiak artu eta kanpora
futbolista billa goaz,
baiña erririk ez da altxatzen
pelota ostikoz joaz.
-V-
Moda klase au nola demontre
begi onakin ikusi!
Futbolistentzat milloiak eta
beste batzuk ezin bizi.
Jakintsuk ere laguntzan faltan
badira joanak igesi.
Au egiten dun erriak ez du
txalo aundirik merezi.
-VI-
Danok dakigu Holandatikan
Cruyff ori etorri dala
ta gure eun anai miñetan
an gogor ari dirala.
Ez derizkiot itxurazkoa,
ez derizkiot formala,
emen bakarrak irabaztea
ango eunen jornala.
-VII-
Lau ostikon truk jasoak ditu
ziento bat milloi eskura,
berak artuta eraman ditu
bere lurreko bankura.
Ango bankuak alaitasuna
ta emengoak tristura,
erri pobrea gera gu baiño
aberatsaren itxura.
-VIII-
Gizon oiek guk artzen ditugu
zearo biotz zabalez
ta berak, berriz, gure erria
maitatzen dute azalez.
Fitxaje oiek nik galdetzen det
egiñak al daude legez?
Ori ez al da esaten dana
"evasión de capitales"?
-IX-
Ez du ajolik geldituarren
futbol kontuan kanpuan,
beste gauzetan baldin bagaude
jaunak bear dan lekuan.
Oraindik ere denboraz gaude
asi gaitezen tratuan,
ea lenbailen gu ere sartzen
geran Europa Batuan.
-X-
Baiña ateak irekitzeko
gaur Europa Batuari,
oker batzuek badauzkagula
esaten digute guri.
Emen geienok badakizute
zer degun bai, oker ori,
politikako partidu gutxi
futbolekoak geiegi.
