Urrezko eztiak
Matxain, Manuel
-I-
Berrogeita amar urte joan dira
alkarri itza emanik,
ta ezin esan danak goxoak
zuentzat izan diranik.
Tarte orretan ezta paltatu
buruauste eta penik.
Amar seme ta ezin osatu
guzientzako jatenik,
gaur arte ezta izan biontzat
egiazko zorionik.
-II-
Kriston dotriņa ez dezute ez
iņoiz eduki aztua,
gose urtetan azi dezute
famili eder askua.
Jornal txikia eduki arren
eta aundia kastua,
zuen kabia eztet ikusi
nik beiņere zapuztua,
bion artean zegoalako
maitasun egíazkua.
-III-
Aiton amonak elbarrituak
ogei urte gutxienez,
etxean bapo zaindu ziņuzten
maitasunik aundienez,
bear zituzten gauza guziak
oeraiņo eramanez,
eta guzia egiņaz beti
borondaterik onenez.
Zarreri eman eta konporme,
naiz zeontzako izan ez.
-IV-
Zoritxarrean moda berriak
badatoz gure errira,
an eta emen dibortzioak,
gaur nunai ikusten dira.
Jarri gaitezen errebistetan
pixka pixka bat begira.
Nun dago zuek gurasoentzat
izan zenduten kupira?
Maitasun paltan, pranko badira
joanak mixerikordira.
-V-
Etxe askotan oker dabiltza,
iņola ezin zuzendu.
Zuen artean orrelakorik
ezta beiņere izandu.
Jornal txikitik amalau lagun
ezi, jantzi ta mantendu.
Larrialdiak zetozenian
alkarri gogor lagundu.
Ordu tristeak pasa bai baiņa,
beti pakean konpondu.
-VI-
Mirari ederrak egiņak ditu,
Manuel, zure jornalak.
Ixpillu ederra izan dute bai
zuen seme ta alabak.
Zuek bezela etorri dira
umillak eta formalak,
danak langille porrokatuak
gaiņera biotz zabalak.
Iņola ezin txarrak atera
zugaitz onaren ezpalak.
-VII-
Zuek ziņuzten eginkizunak
daude ederki beteak,
beste ainbeste egiten saia
seme ta alaba maiteak,
Zabaldu beti gurasoeri
zuen etxeko ateak,
bukatu bitez gaur oientzako
izerdi eta nekeak,
danen ondoan igarotzeko
gelditzen diran urteak.