Pake urtea

Matxain

 -I-

 Emen daukazu, Jesus maitea,

 gaur Aieteko erria,

 beti bezela gure jaietan

 Zuregana etorria.

 Emen daukazu kale gizona

 ta emen nekazaria.

 Emen nagusi eta morroia,

 emen txiki ta aundia.

 Emen dauzkazu gaur egiten

 zaienak omenaldia.

 Ainbat urtetan gure elizan

 seroratzan ibilia.

 Komeni bada entzun iguzu,

 Jauna, gure eskaria,

 urte askoan gorde itzazu

 Manuel eta Maria.

 -II-

 Zintzo betetzen ez degulako

 zuk jarritako legea,

 gure artean indartu zaigu

 burruka ta aserrea.

 Aserre dabil kale gizona

 ta aserre abadea.

 Galdu ote da garai bateko

 gure euskaldun fedea?

 Bakarra degu nere ustez

 pakeratzeko bidea.

 Errespetatu dezagun beti

 lagun urkoen idea.

 Ez dezagula beinere esan

 onena dala gurea,

 gu juzkatzeko naikoa da

 zeru ta lurren Jabea.

 -III-

 Erri batzuek ikusten ditut

 danetik sobre dutela,

 beste batzuek beti gose

 negarra dariotela.

 Pake urtean gauden ezkero

 ezin jarraitu onela

 edo pakerik ez da izango

 gure artean bestela.

 Egizu, Jauna, erri aundian

 konturatu ditezela

 gurutze ortan txintxilikari

 guziongatik zaudela

 eta azkenik indartu zazu

 guzion fede epela,

 lagun urkoa maita dezagun

 gure burua bezela.