Ostegun santu egunarekin
Matxain, Manuel
1
Ostegun Santu egunarekin,
ia eguardi aldean,
nere burua lenengo aldiz
ikusi nuen aidean.
Gure jolasak mundu guzian
erakusteko idean,
lau kiroltzale jarriak gaude
Japoi aldeko bidean.
2
«Usategieta», Agirre jauna,
bestea berriz «Soarte»,
egazkiñean animo pranko
neroni eman didate.
Naiz egun argiz ta ondo pasa
Alaska ta Polo Norte,
nere burua etzan lasaitu
Tokio'n jetxi bitarte.
3
Egia esan, joan aurertik ni
nengoen itza emana,
bertso batzutan adierazteko
bertan ikusten nuana.
Erri umilla, eta ixilla,
gogor egiten du lana,
urte gutxian konpondu dute
gerrak ondatu zuana.
4
Gorputzez txiki ditugu baña,
danak ederki eziak,
errespetu ta edukazioz
betik goraño josiak.
Garbintasunez berdin-gabeak;
gañera ondo jantziak,
ikusi ditut lur aietako
andre ta gizon guziak.
5
Erri eder au, nik ezin esan,
len zegoenik atzera,
baña goraka gogor dijoa
ogei urtetik onera.
Auxe da antxe, japones bati
nik egin nion galdera,
gerra galduta ez ote diran
irabazian atera.
6
Ondo dakite, erantzun zidan,
orain agintzen daudenak,
denborarekin erriarentzat
zer diran gauzik onenak.
Eskolak gogor ugarituta,
bakandu berriz tabernak,
auek baitira gizona iñoiz
asto biurtzen dutenak.
7
Gaur japonesak artua dute
zentzuz bide bat berria,
ikusi dute zer dan gazurra,
ikasi zer dan egia.
Ta len taberna zegon lekuan
eskola dago jarria,
goi mallaraño igotzearren
maitatzen duten erria.
8
Barka zaidazu, gaur gogor sainar
banator, tarbernaria,
neurrian ona dala ba-dakit
saltzen dezun edaria.
Baña illuna dagon tokian
egingo bada argia,
liburuetan geiago bear;
ardotan berriz erdia.
9
Bein entzun nion mediku bati,
euskaldun askon odola,
erdi-erdia, gutxienean,
izaten dala alkola.
pena eman zidan au entzutea;
ezin ukatu iñola,
frutuagatik jakiten baita
nolakoa dan arbola.
10
Ez dezagula gure zentzua
jarri alkolaren mende,
ori egiten duten erriak
txit atzeratuak daude.
Izan gaitezen ordu guzitan
geure buruaren jabe,
bestetan ere bizitzen dira
orrenbeste edan gabe.
11
Musean egin, kontuak esan,
ta lasai edan ardua,
egia esan, beti izan det
orretarako gogua.
Baña uste det, zorionean,
iritxi dala ordua,
pixka-pixka bat kanbiatzeko
neronen bizimodua.
12
Ez det esaten tabernetara
Berriz ez naizenik joango,
gauza bat dakit: lenago aña
nik ez dedala edango.
Promesarikan egin dedanik
ori ere ez det edango,
danak kolpean uztea, noski,
ezpaita errez izango.