Nagusi-morroien alkarrizketa
Matxain, Manuel
NAGUSIAK
Au da mundua!, zazpiak jota
oraindik zaude oiean,
aldameneko Martin ari da
bi ordu ontan laiean.
Gelditu gabe ikusten det nik
astean eta jaiean,
orretxengatik zugana nator
zedozer esan naiean.
MORROIAK
Aukera ederra daukazu, jauna,
oraintxe itzegiteko,
zu agintzeko jaioa zera,
ni berriz obeditzeko.
Baña ordua dala uste det
emen danak jakiteko,
sei egun dira lanerako ta
beste bat jai egiteko.
NAGUSIAK
Barkatu zazu, morroi maitea,
gaur artu badizut kargu,
nik pentsatzen det naikoa dala
lotarako zazpi ordu.
Baserritarrak udaran gogor
beti saiatu bear du,
negu guzian bere ganbaran
zerbait eduki nai badu.
MORROIAK
Zortzi orduan lan egiteko
lege bat jarria ba-da,
ta nagusiak jartzen diote
berari amaika traba.
Negu gorrian txit onak dira
arto, babarrun da baba,
baña Jainkoak deskantsatzeko
emen jarri zuen gaba.
NAGUSIAK
Zuk lo eginda, zeiñek jorratu
babarrun eta artuak?
erdi-negarrez begira egon naiz;
danak belarrak artuak.
Zortzi ordu ta... «Sábado inglés»,
ta orrelako kontuak,
onera ekarri nai dizkigute
granuja purrukatuak.
MORROIAK
Zuk nai zenduke, gelditu gabe,
batetik eta bestera,
egun guzian ibiltzea ni
makina baten antzera.
Atzo sorotik amarrak jota
etorri nintzan etxera,
ukullun dauden zortzi bei eta
lau txekor gobernatzera.
NAGUSIAK
Atzo amarrak jota etorri,
gañera zortzi bei jetzi,
baña goizeko zazpiak ere
zuri oiean iritxi.
Soroan dagon kosetxik ezin
gentzake guk galtzen utzi,
gero neguan izango degu
bestela jateko gutxi.
MORROIAK
Ondo dakizu, oraindik ere
udaran erdian gaude,
dagonerako negu gorrian
beldurrez jarria zaude.
Egin zaitea arta-jorrako
makina on baten jabe,
gaur baserrian ezer ez dago
aurrerapenikan gabe.
NAGUSIAK
Kaltetarako ez ote dira
etorri aurrerapenak?
zu bezelaxe asko dira gaur
oker pentsatzen dutenak.
Makina oiek austen dituzte
landare eta aienak,
atxurrak dira oraindik ere
erremintarik onenak.
MORROIAK
Nagusi jauna, esan dituzu
zuk astakeri bapoak,
lanaren mende egongo dira
beti zu bezelakoak.
Ezpadituzu gaur ontzat artzen
morroiak esandakoak,
belar artean galduko dira
babarrun eta artoak.
BERTSOLARIAK
Bertsolariak pasadizo au
ejenplu gisa jartzen du,
emen bakoitzak bere aldera
beti gogor tiratzen du.
Milloika gizon dauden tokian
okerrak nola zuzendu,
etxe batean gaur bi bakarrik
ezin badira konpondu?
Era ontako gauzak ez dira,
zoritxarrez, gaur asiak,
beti asarre ikusten ditut
morroi eta nagusiak.
Aurrera ere izango dira
emen ezin ikusiak,
alkar maitatzen ikasi arte
munduko gizon guziak.