Marmarrak

Matxain

 -I-

 Lagun batzuek egin didate

 neri batzuetan galde

 nola ez detan emen idazten

 gaurko Elizaren alde,

 oien artean egongo dira

 gutxienean bi talde

 baiña guziei guk laguntzeko

 premi galantean daude.

 apaizak ere ez dira ezer

 gure laguntzarik gabe.

 -II-

 Bi milla urte Jesus maitea

 ietxi ziñala zerutik

 zer esanaren faltik ez degu

 gizonok izan geroztik.

 Deabruaren antza barrutik,

 santu itxura kanpotik,

 lagun urkoak lur jota ere

 ez digu guri inportik,

 gure griña ta bizio txarrak

 gelditzen badira zutiK.

 -III-

 Aldakuntza asko egiñak ditu

 urte auetan bizitzak

 ta berakin bat aldatu bear

 pixka bat gure elizak.

 Sotana kendu, galtzak jantzita

 ibilliarren apaizak,

 lengoak dira emen legeak

 lengoak Kristoren itzak,

 emen geiena mudatu dana

 dira gizonen egintzak.

 -IV-

 Elizan aurka ez det itzikan

 dakidala aterako

 kataioakin bere seme ni

 bein egin nindutelako.

 Baiña bagaude katolikoen

 izena deguna pranko,

 apaiz gazteak langillearen

 alde asi ordurako

 komunistaren izena jartzen

 diotenak sekulako.

 -V-

 Oponioa libre da eta

 nik emango det nerea

 dudan jartzen det egia esan

 orrelakoen fedea.

 Pobreen alde itzegiteko

 badute eskubidea

 ta jakin danok ori ez dala

 komunistaren legea

 baizikan Kristok berberak ern

 ipiñitako moldea.

 -VI-

 Gauza batzuek aipatu bear

 gaur apaizak elizetan,

 naiz gaizki egon len esandako

 kristau batzuen ustetan.

 Gaurko okerrak, gai artuta,

 asten badira izketan

 esaten dute sartzen dirala

 politikako gauzetan.

 Elizan esan bear egiak

 ezin duanak hestetan!

 -VII-

 Egiak orain esaten asi

 zaizkigu kulpitotikan,

 orretxegatik daude batzuek

 zearo arriturikan.

 Arrazoiakin ez luke iñork

 egon bear ixilikan,

 orixe beintzat agintzen dute

 gaur Erroma aldetikan,

 Kriston dotriñaz ibiltzen dana

 ez da sartzen politikan.

 -VIII-

 Gaurko Eliza nola dagoen

 goimaitasunez beterik

 ez du merezi iñola ere

 laguntzik gabe uzterik.

 Alde batera utzi ditzagun

 gure arteko uskerik,

 politikako kontu oiek eta

 gaiñontzeko umekerik,

 oiek ez dira egien aurka

 dabiltzan batzuk besterik.

 -IX-

 Elizak orain agintzen dauzka

 gotzai argi ta azakarrak

 eta beraidi jarraitu zintzo

 apaiz gazte eta zarrak.

 Utzi ditzagun alde batera

 ikamika eta marmarrak,

 bi taldetako apaizak eta

 mundu guziko seglar-ak,

 iñor badata gu gaude emen

 ejenplo eman bearrak.

 -X-

 Asmo oiekin asi gaitezen

 emendik aurrera beintzat

 ejenploakin indartuz beti

 esaten ditugun itzak.

 Berdindu bitez gure aurrean

 ipintzen diran penditzak.

 Eskandalorik ez beza eman

 geiago gure bizitzak,

 urte alaiak ikusi ditzan

 Jesukristoren Elizak.