Lanaren mende nabil
Matxain, Manuel
-1-
Lanaren mende nabil
korri eta korri,
orregatik ez naiz ni
lenago etorri.
Gaur ipiñi nai dizkat
amar bertso berri,
Barzelona'n il zaigun
euskaldun on orri.
-2-
Mundua onela da,
naiz askok ez uste,
egun batean alai
ta bestean triste.
Lengoan alkarrekin
kontatzen lau txiste,
gaur beretzako nator
otoitz baten eske.
-3-
Berri bat zabaldu da
alderdi guzita,
Uriona il dala
katea autsita.
Erri bat otoitzean
ari da ixilka,
bere seme onena
ilda ikusita.
-4-
Sasoirik onenean
orain zegoan da,
askok ezin sinistu
il dala esanda.
Jaunak egiten digun
oju bat izan da,
esan nairik bezela:
laister zure txanda.
-5-
Erri oso bat dago
Ixilka negarrez,
daukan pena gordetzen
ezpaita ain errez.
Gaur ni bakar bakarrik
nago irriparrez,
zu zeruan zaudela
egin baitet amets.
-6-
Beti bezela aixa
igoaz aldapa,
zeruko atietan
zuk jo dezu, «ta, ta».
San Pedro'k esan zizun
kanpora aterata:
pasa, kristau zintzoa
izandu zera-ta.
-7-
Amets zoragarri au
egin nun ordutik,
iñola ezin kendu
neronen burutik.
Millaka aingeru, ta,
zu erdian zutik,
sari eder bat artzen
Jaunaren eskutik.
-8-
Or eztago «Fagor'ik»,
or eztago «Kas'ik».
or ezta esarrea
sortzen duan gauzik.
Jaunarentzat berdiñak
aundi eta txikik,
or ezta pakea ta
zoriona baizik
-9-
Ametsa bukatuta
berriro lurrian,
orain zer ikusten det
begien aurrian?
Negarrez Muxika'n da,
negarrez Mungia'n,
danak pozez txoratzen
egon bearrian.
-10-
Merezi zenduan da
gaur zeruan zaude,
egin zera betiko
zorionen jabe.
Balentin, erregutu
beti gure alde,
ez gaitezen gelditu
zu ikusi gabe.
|