Gazteak eta zarrak danak ez dira txarrak
Matxain
Alperkeriak uxatu eta
ekiten diot lanari
kastigutxo bat eman bearra
daukat nere buruari;
kristau artean badabil orain
jaunak zer esan ugari
oroitu gabe danok gerala
mundu ontan pekatari.
Urte au ere aurreratu ta
lengo naigabe berdiñak
ai zenbat negar sortzen dituan
alkar ikusi eziñak;
gure barruan sartuta daude
pixti txarrenaren griñak
gizonak gera emen askotan
animalirik aundinak.
Gaur munduari begiratu ta
derrigor esan bear du
maitasunaren arrasto danak
ez ote ditugun galdu.
Alkarren aurka gabiltz egunak
dituan ainbeste ordu
paradiso bat bear zuana
inpernu biurtu degu.
Kristau batzuen jokaera nik
gaur billatzen det itsusi
lagun urkorik ezin du askok
begien pintan ikusi;
gauza onikan iñoiz egin ez
kontatu milla fantasi
oiek ez dute Kriston dotriña
oraindik ondo ikasi.
Neretzat berdin da eskubia
ta berdin ezkerrekoa
bear bezela betetzen badu
daukagun egotekoa;
elizara maiz inguratzea
ez da izaten naikoa
lagun urkoa maite duanak
arek maite du Jainkoa.
Apaiz gazteak txarrak dirala
entzuna naiz publikuan
egi galantak nunbait esaten
oiek beti kulpituan.
Kristo ber-berak orduko itzak
orain esan bazituan
komunistatzat artuko zuten
gizon askok segituan.
Aldakuntzarik nai ez dutenak
egiten diete traba
argiak nunbait miñ ematen da
berak maite duten gaba;
Aita Santuen esanik ere
ez badigute nai laga
emen norena entzun bear da
ori galerazten bada.
Apaiz gazteak neretzat dira
langille purrukatuak
ta berak daude langillearen
problemarekin lotuak.
Badakizkigu guk nola ziran
garai bateko kontuak
orduan ere orain bezela
danak etziran santuak.
Milla tokitan esana naiz ta
ez naiz aspertzen esaten
apaiz gazteak ari dirala
ejenplo onak ematen.
Gure auzoan or ari dira
lana galanki egiten
eliz berria zabalduko da
berairi esker Aieten.
Pausoa franko emanak dira
aspaldian bazterretan
danok dakigu ia bi urte
igaro dira obretan.
Jaunari esker bukatu dira
naiz zenbait egon zorretan
laguntzen faltik ez da izango
seguru nago orretan.
Maiatzerako aldatu dira
gure barrioko jaiak
seguru nago izan ditezke
lengoak bezin alaiak.
Berri on bat nik badet zuentzat
arreba eta anaiak:
lenengo meza emango digu
Gipuzkoako gotzaiak.
Agur bero bat gure gotzaiak
txit merezia ez al du?
Aietearrak, al dezutena
meza ortara azaldu.
Gure biotzak oso osorik
berari bertan zabaldu
ikusi dezan maitasun garrik
emen eztala itzaldu.