Enbeita eta bertsolariak ispilu
Matxain, Manuel
Jaunari esker maiz sortzen dira
bertsoak jartzeko gaiak,
oraingo auek zorionean
dira zearo alaiak.
A zer aukera jarriko digun
Enbeita zarraren jaiak
biotz biotzez besarkatzeko
Bizkai aldeko anaiak.
Berandu baiņa etorri zaizu
Enbeita maitea, txanla,
lengo urteko omenaldian
ala aukeratu zan-da;
Nik zure berri ondo badakit
ta ez lagunak esanda,
gerra denboran ibilli giņan
alkarri esku emanda.
Egun auetan asko datozkit
gure lantegi aldera
eta geienak egiten dute
neronengatik galdera;
Nik lagun asko ditudala-ta
ez al nezaken atera
Astoriako jai ortarako
dozena erdi bat sarrera.
Euskaldun asko bilduko gera
ori seguru badakit
Enbeita eta bere lagunak
bertan entzuteagatik.
Zu lana pranko egiņa zera
naiz ez atera zaratik,
merezi dezun omenaldia
egingo dizu Donostik.
Gizon jatorra, jatorrik bada
ta bertsolari bikaiņa
egien alde dantzatu dezu
beti zerorren mingaiņa.
Orain arteko lanak alperrik
izango zituzun baiņa
nekez bederik jasoko dezu
merezi dezun ordaiņa.
Etzait gustatzen neri sartzea
idazlearen lanetan
nik ezer gutxi dakidalako
gramatikako gauzetan;
Baiņa bi talde ikusten ditut
emen alkarrekin setan,
gure artean au gertatzea,
negargarria benetan.
Danok dakigu emengo seta
guk noiz ezkero daukagun
eta onela jarraitzen bada
guziok gera errudun.
Bertsolarien bide jatorra
ia guk noiz artzen degun
esan bearrak esan bai baiņa
berriro len bezin lagun.
Euskaldun asko jarriak gaude
egoskor eta kaskallu
ta gaur gabiltza besa-tiraka
gure etsaien jostallu.
Ez litzake ez emen izango
dabillen ainbat istillu
bertsolariak artu ezkero
geronentzako ispillu.
Bertsolariak ez dakit gauzak
nola artuko dituzten
baiņa ez dira beren artean
edozein moduz zapuzten.
Ta egunero ari zaizkigu
guziori erakusten
gizonak jakin bear duala
esaten eta entzuten.
Setak utzi ta artuko dala
aurki bide bat zuzena,
egia esan, neronek beintzat
badaukat itxaropena;
Bi aldetatik ikusten det nik
borondaterik onena,
au ikusita ez konpontzeak
neri ematen dit pena.
Atxekin edo atxerik gabe
luma ibilli pakean,
arrazoi ori nundik dabillen
denborak esan artean;
Elizak ere asmo berriak
artu dituan urtean
ez dezagula geronen kulpaz
Euskera sartu lurpean.
Bakar batzuek gu ikusita
beti setan gabiltzala
esaten dute gure izkuntzak
bizia motza daukala;
Baiņa nik ere eman nai nuke
nere iritzi apala,
bertsolaririk bizi dan arte
Euskera biziko dala.
