Egindako ametsa
Matxain, Manuel
-1-
Jesus maitea, neronen gaurko
erregua entzun beza,
ondo dakit nik laguntzik gabe
naizen gauza ezereza.
Ta baldin ori ematen badit
derizkiot lan erreza,
bertso batzutan adieraztea
bart egindako ametsa.
-2-
Kanpai-negarrak entzun nituan
Eliz Nagusian, din, dan,
enteratu naiz gizon aundi bat
nola derrepente il dan;
titulu eta milloia pranko
utzita nola joana dan,
amets egin dut, ez ote duten
gauza oiek balio an.
-3-
Jakin dudanez, berak ba-zeuzkan
lur da jauregi ederrik,
orain bi metro naikoak ditu,
ez du geiagon bearrik.
Langilleari zupatutako
diru guziak alperrik,
arrokeriak Kriston aurrean
ez dualako indarrik.
-4-
Mendekoari erakutsia
zan ori amaika gose,
litxarrerorik urrearekin
iņork ezin baitu ase.
Emen jarriak eduki arren
milla negozio klase,
bertan utzita aldegin bear
ez duanak bezelaxe.
-5-
Pobre, aberats, txuri ta gorri,
danon bizia da motza,
ustegabean etortzen zaigu
guregana eriotza.
Errukarria iņon izerdiz
gizentzen duana poltsa,
gaiņera laister erorko zaio
Kriston justizi zorrotza.
-6-
Aspaldi ontan ugaldu zaigu
gorrotoa ta zizaņa,
au ez ote da len esandako
pekatuaren ordaiņa?
Anaien gisa gu ibiltzeko
Jaunak agintzen du baiņa,
lagun urkorik ez dugu maite
arratoi-txakurra aiņa.
-7-
Negargarria gure artean
dabilien zurrumurrua,
negargarria alkarrentzako
gaur daukagun amorrua;
alare santu juzgatzen dugu
geronen buru-arrua,
au ez ote da oker guziak
sortzen dituan errua?
-8-
Mundu onetan izan ditugun
Santu ta Santik aundiņak,
esaten zuten Kriston aurrean
danok gerala berdiņak.
Baiņa oraindik, zoritxarrean,
ba-daude buru-ariņak,
uste dutenak oiek dirala
komunistaren dotriņak.
-9-
Dotriņa on bat emen ba-dago
guziontzako jarria,
ondo betetzen saia gaitezen,
morroi ta agintaria.
Gogoan izan, Kristok eman zun
sententzi izugarria,
pekaturikan ez duan arek
bota dezala arria.
-10-
Morroi, nagusi, agintariak,
ni bersolari apala.
danok aitortu bear genduke
pekatariak gerala.
Urteberriak asmo berriak
gugan ekarri ditzala,
arrazoiaren indarrak beti
emen agindu dezala.
