Bizimodu estua
Matxain
-I-
Ez dira alaiak egun auetan
zabaldu diran berriak,
komeri latzak pasa bearra
ditula gure erriak,
obea dala danok aurretik
ondo artzea neurriak,
galtzak pixka bat estututzeko
diote agintariak.
-II-
Ministroaren esanak neri
sartu didate dardarra,
berriro danok daukagula
galtzak estutu bearra.
Jexten ari da pezeta eta
jexten ari da dolarra:
txiki ta aundi, guziontzako,
dator emen negu txarra.
-III-
Mundua nola dagon berriro
dana zearo nastua,
ez da erraza izango noski
egiten danon gustua.
Gaur lanetikan bizi danentzat
txit bizimodu estua.
Ogei durokin ez du beteko
orain konprako xextua.
-IV-
Nere ustetan ari da jartzen
gauza oso seriua,
lenago juxtu dabillenentzat
auxe da alibiua:
guzien kulpa zuana emen,
omen zan petroliua,
gaur bere kulpaz igo al dira
azukre ta oliua.
-V-
Gu geienean exkax gabiltza,
au bizimodu alua.
Beti zerbaite badago emen
galdu arazteko lua.
Ez bedi, beintzat, emen azaldu
geiago estraperlua.
Gutxienean izan dedilla
esnea eta talua.
-VI-
Olioa ta azukrea gaur
emen daude exkaxian.
Etzan izango dauzkagun lurrak
ondo dantzatu bazian.
Emen aurtxoak azukrerikan
gabe jateko trantzian,
ta besterentzat erremolatxa
biltzen gabiltza Frantzian.
-VII-
Gizonak zerbait egin bear du
premian dagoenean,
emen pagatzen etzaielako
joaten dira geienean.
Nekazariak oso gustora
aritzen dira lanean,
lana eginda zerbait probetxu
nunbait ikusten danean.
-VIII-
Emen askotan egiten ziran
len millaka tonelada,
baiņa saltzeko orduan beti
oztopoa eta traba.
Azkenerako danak nazkatu
ta egiteari laga,
gaurko azukre exkaxi ori
ortikan datorrena da.
-IX-
Ari diranak egun sentitik
gauean illundu arte,
ez al da ondo, irabazian
pixka bat artzea parte.
Azukrerikan ez da izango
emen geiago sobrante,
nekazaria bear bezela
pagatzen ez dan bitarte.
-X-
Okerra au da, nere ustetan,
agintari ta nagusi,
ni arritzen naiz orainartean
nola ez degun ikusi:
lana eginda ezin badira
itxura antzean bizi,
aurrera ere joango zaizkigu
estranjerira igesi.
