Au mundua
Matxain
I
Gure lenengo guraso zarrak
ziran Eba eta Adan
mundu ontako martxa geroztik
badakizute nola dan;
gerra, burruka ta naigabea
bada emen, ez bada an.
Aralar puntan dauden artzaiak
biziko dira patxadan.
II
Jesus maitea, au da mundua
gizonok egin deguna,
arrigarria atentadu bat
izaten ez dan eguna.
Bi xoxen truke saltzen degu gaur
anaia eta laguna.
Labe gorria biurtu degu
zerua bear genduna.
III
Kristok dotriņa ipiņi zuan
gizonek bete zezaten,
gero pakea ta zoriona
zeruan izan dezaten.
Ao betean danok gabiltza
kristau gerala esaten,
baiņa bear dan ejenplorikan
iņork ez degu ematen.
IV
Nekerik gabe bildu nai degu
emen geienak ezkurra,
baiņa batzutan ez da izaten
nai degun bezin xamurra,
geronentzako puska goxoa
bestearentzat ezurra.
Mundu ontako egia au da,
gaiņontzekoa gezurra.
V
Danok nai degu lujuan bizi
diru artean igari,
baiņa gizonak ez lezake egin
Jainkoak ainbat mirari.
Eskuartean lau txanpon eta
bi tiro eman lanari,
gero gaiņetik iseka egin
lanean ari danari.
VI
Gauza bat dago zoritxarrean
elurra bezin garbia,
ez degula nai iņork atera
kopetetik izerdia.
Ta danok berdin esaten degu
ez ote degun obia
iņoren kontu jatea emen
eguneroko ogia.
VII
Gizon geienok nai degu emen
bapo janda ondo bizi,
bestearentzat izerdia ta
guretzat milla ganantzi.
Naiz egunero elizara joan
ta limosnatxo bat utzi,
Jaungoikoaren aurrean onek
ez ote du indar gutxi?
VIII
Gizaldi onek ipini ditu
emen aurrerapen pranko,
baiņa beldur naiz ez ote diran
geienak kaltetarako.
Bistan dagona ezin ukatu
egi aundia dalako;
naiz izandu da orain ainbeste
sekuestro eta atrako?
IX
Danok dakigun gauza da eta
ez dago esan bearrik,
gure kaltean dirala danak
bide txarretik etorrik.
Eta pakerik ez da izango
gabiltza alper-alperrik
gizonak emen ez duan arte
Jaungoikoaren beldurrik.
X
Gure asmoak bide onera
lenbailen aldatu bitez,
zeru ederra irabazteko
gure izerdi ta nekez.
Gaurtik aurrera artzen ditugun
lan da ezbearren partez
azken ordua datorrenean
Jauna errukitu zaitez.