Bertso berrien zale zeraten
Manterola, Marzelino
Bertso berrien zale zeraten
euskaldun maitagarriak,
bakar batzuek ortxe dijoaz
zuengatikan jarriak.
Pasa ditugu Santo Tomasak,
Gabon da Eguberriak,
sano ta ondo dagonantzako
zein egun zoragarriak!
Bertso zar eta ipui kontatzen
zenbat aiton eta amon,
oitura ori galtzen ari da,
lenago geiago zegon.
Gaur bildu dira sendi guztia
naiz len banaturik egon,
egun auetan ikusitzen da
maitasun asko nun dagon.
Emendik kanpo bizi diranak
eztira aztutzekoak,
pentsamentutan naiz eman egon
eztira etortzekoak;
beren matraillak malkoz bustiak,
eta berdin etxekoak,
beste urte bat iritxiko da
lagun zar biotzekoak!
Ta beste zenbait urrikalgarri
urtetan gaixorik daude,
oietaz pixkat oroitutzea
ez ote genduke obe?
Gaitz baldurtia egiña dago
beren gorputzaren jabe,
etengabeko oiñazepean
ordu atsegin bat gabe.
Ain egoera samingarria
pixkat poztu nai nuke nik,
udaberria etorriko da
negu illuna joanik.
Anai arreba errukarriak,
ez aztu nere esanik,
Salbatzaillea jaio da eta
ez galdu itxaropenik.
Zorion eta agur guztioi
Manterola'ren partetik,
obeak jartzen saiatuko naiz
orain datorren urtetik.
Irakurle ta entzule danok
maite zaituztet gogotik,
Urte Berri on, zoriontsu bat
opa dizutet Lezo'tik.
Alaxe izan zazula zuk ere,
adiskide. Ta bide batez, gure
bordatxoaren gaillurrera igota,
opari bat aizatu nai genduke
ozenki: irakurle guztion asmo
ta naikundeak oparo bete di-
tzala asi Berri degun Urte Be-
rriak. Amen.