Uda berri, gora zazu egillia
Aldabe, Joakin
Gogor katazkan ibilli ondoren
ona ta txarra luzaro,
azkenik, noski, Uda berria
nagusitu da osoro.
Ideki, denak, ongi begiak
zoragarria ikusteko.
Gurekin degu eder-ederra
Uda berria berriro.
Emen ikuitzen dute eskuak
Jainkuen almena garbiro.
Buru gaiñetik laiño illunak
iges arruti egiñ dute.
Zeru ederra ikusten degu
iñungo lausorik gabe.
Argia ujolan zabaltzen zaigu;
zoko guztik ditu bete.
Zorionez gero bazter zabalak
ditu denak ongi ase.
Noiz nai aserre zegon itsasua
gelditu da bare-bare.
Neguko luan erori eta
ixill zegozten mendiak.
Iñortxo gabe otz-otz zeudezen
txori txikien kabiak.
Orain mendiak ernatu dira;
antxen dabiltza ardiak.
Txoriak berriz emen ditugu;
entzun dira abestiak.
Itzalpe ona arkitzen dute;
itzal ta jan ugariak.
Bere orduan! ordu onian!
bizkortu da mastegia.
Larru bizirik bazekon ere,
loratu da kerezia.
Uda berriak suspertu digu
mendin arantza loria.
Uda berria egiz da alaia,
egiz sasoi berezia.
Zugaitz oiñ pian arkitu leike
lasai asko gerizia.
Geldi-geldirik zeuden lur aldek
irauli ditu goldiak
zakar guztiak iraul ondoren
ortzaren bidez ariak.
Lurpean sastu ta izaten dira
berarentzat ongarriak.
Orrela lurra molda ezkeroz
ereiñgo dira aziak.
Zeiñen biarrak aldez aurretik
diran lan eta izerdiak!
O zeiñ arlote zeuden mendiak!
etzeukaten jantzirikan!
Uda-Azkena agertuz gero
etzegon an belarrikan.
Zugaitz ostua noizbait apaiñak,
zimaur ordun iraulketan.
Bior ta aberek ara onea;
eziñ kendu goserikan;
ardi gaxuak bildu ta antxe
elur iges gorderikan.
Uda berria, zuk zer daukazu
orren eder azaltzeko?
Jartzen dituzu leku guztiak
apaiñ zoriz zoratzeko.
Bideko lurrak ostotu dira
ongi dena apaintzeko.
Iratziak berriz estali ditu
bazter zabalak osoro
bere azpian ardi txuriak
itzalian gordetzeko.
Uda berriko denbor gaxotan
ateraka da kalera
aitona zarra bizkar makurra
eguzki onez asetzera.
Gordeta zeuden zulo barrundik
ertengo dira kanpora
prixti guztiak abo zabalik
berentzat janaren billa.
Denari, noski Uda berriak
emango dio zoruna.
Zuk, Jainko altzu, jakiñen bidez
egiñ zindun gauzak ongi.
Bazter guztiak aitortzen dute
egi-egi dala ori.
Egun batian Zu ludi ontan
ziñan lanen gogoz ari.
Geroz banaka osatu zindun
eziñ iñola obeki.
Nere biotzak txalotzen zaitu.
Esker onenak nik Zuri.