Mendia zer dan eta nola dan

 I

 Mendia zer dan eta nola dan

 nik ezin esan itz bitan,

 bañan askotan egon izan naiz

 ni begira poz eztitan;

 naiz inguratu ekaitz garaian,

 eta berdin eguzkitan,

 maitagarria degu benetan

 urteko sasoi guztitan.

 II

 Beeko txokotan erri ta uri,

 leku ederrik badira,

 bañan alare jarri gaitezen

 mendi gañera begira.

 Osasun billa ere nora jun

 gu aiñ leku egokira,

 zalantzik gabe al dan guztian

 igo dezagun mendira.

 III

 Gure eskutan daukagulako

 gauza askoren aukera,

 ez da berdiña mundu onetan

 gizon guzion jokera.

 Batzuek lasai dauden bitarte

 asko dijoatz nekera,

 al dan azkarren iritxi naian

 mendi gañeko pakera.

 IV

 Zenbait eratan zabaltzen diran

 mendi gañeko emaitzak,

 bertan sendatzen dira askotan

 gorputzeko gaxo-gaitzak

 Gurutzeakin orniturikan

 zenbait gallur ta arkaitzak,

 gure ondotik aldendu ditzan

 gaurko munduko ekaitzak

 V

 Baso-eleizak eratu zaizka

 mendian Goiko-Amari,

 lan ori geien guk zor diegu

 gure aurretik juanari.

 Kristau jatorrak ekin baño len

 eguneroko lanari,

 otoitz beroak eskeintzen dizka

 guztion AMA danari.

 VI

 Zuaitz ederrak ikusten dira

 oraindik mendi gañetan

 indar bereziz josiak dira

 adar gerri ta zañetan;

 ta nekaturik guatzenian

 izerdiz gorputz-soñetan

 itzal goxoa dute guretzat

 udaran bere oñetan.

 VII

 Bañan zuaitzak gertatzen dira

 iñoiz gutxita urriak,

 noizean beinka galtzen bai ditu

 tximist ekaitz ta arriak.

 Len dauzkagunak ondo zainduaz

 eta landatuz berriak,

 ontan berandu egin baño len

 artu ditzagun neurriak.

 VIII

 Gauz itxusi bat ikusten degu

 iñoiz mendira juatean,

 ontzi uts eta leiar pusketak

 zuaitz azpiak betean;

 norberetzako mesede gabe

 iñorentzako kaltean,

 mendiak garbi egon ditezen

 danok saiatu gaitean!

 IX

 Bizimoduko zurrunbilloak

 askotan gaitu nastutzen,

 gorputz-animak ortik dijoaz

 bear-baña geigo estutzen.

 Bañan gazteak goraka beti,

 ta onek gaitu poztutzen,

 pake ta osasun goian dirala

 ez dutelako aztutzen.

 X

 Igande goizez mendi aldera

 or dijoa gazte pilla,

 naiz ta ez egon mendi gallurra

 gertua edo urbilla.

 Leku obera nora jun leike

 pake ta osasun billa?

 bide ortatik gaztedi ori

 beti leiatu dedilla.

 XI

 Aldatz gogorrak atera arren

 izerdi ta arnas estu,

 gero datorren pakea zer dan

 ezin liteke sinistu.

 Abesti goxo, soñu xamurrak,

 oiu alai eta txistu,

 lagun artean anai bezela

 alkar-maitasuna piztu.

 XII

 Mendian egin izan ditugu

 zenbat adiskide-lagun,

 gogoan izan alderdi onak

 nola menditik dauzkagun;

 gorputz-animen onuragarri

 beti aitortu ditzagun,

 eta aldegun guztian danok

 mendira igo dezagun.