Larrazkena

Lucien

 1

 Hanitch kobla agertzen zaiku Manechetik.

 Larrazkena aiphatuz bethi gain gañetik;

 Zer boztario die barnian sarthurik?

 Ziberoan ez dugu segur holakorik.

 2

 Orhitzen girenian heben Larrazkenaz,

 Lehenago gunian gaztaña ederraz!

 Arratsetan etchetan zarthanak karraskaz.

 Orai zarthanik noun da? Ez da zer erreraz.

 3

 Gaztañatze ederrek gutie kitatu,

 Pharte eihartu eta, houn direnak saldu:

 Eta gero emaiten zerbait estakuru:

 Gaztañatzer zaiela eritarzun sarthu.

 4

 Gaztañen jatiari gunian edaten:

 Kostuma zahar houra ari zaiku galtzen;

 Areta ez gunian lehen guk phentsatzen,

 Larrazkenak zeikula hori ekharriren

 5

 Lehen, larrazkenian, laborarietan,

 Besta handiak guntian bargera egunetan;

 Oihal pheza luziak baziren etchetan;

 Orai sosa eskian salgia hoietan.

 6

 Urrietala gabe ginen iratzartzen,

 Chederen hedatzera herian abiatzen,

 Bilhagarro gizenak guntin hotzamaiten

 Orai ahouan dugu khurutche egiten.

 7

 Larrazkenaz gunian aurthen mintzaldia,

 Manechen arabera, denbora lilia;

 Jinkouak emaiten badu hobeche bestia,

 Guk ere eginen dugu gorago khantia.

 8

 Arte hountan dezagun egin aharrausi,

 Manech bersularier guk igor goraintzi,

 Nahi girade izan adiskide heki

 Larrazkenaz ez othoi espanturik hati.