Nere andreari

Txirrita

 1

 Frantzes euskaldun bat etorri zait

 ipiñitzako bertsuak,

 deklaratuaz aren etxian

 gertatu diran kasuak;

 danak ez dira errexak baño

 esango ditut batzuak

 argitasuna ematen badit

 gure Jaun amorosuak

 2

 Nere barrengo sentimentuak

 nai dizut adierazi

 zer estadutan gelditu naizen

 iñork nai badu ikusi;

 izarra baño ederragoko

 andria juantzait igasi

 orañ bi arte aldegiñ ziran

 geoztik ez det ikusi.

 3

 Ogeita amar urte daukazkit

 oraindik franko gaztia

 eta andriak bi gutxiago

 ¡au bizi modu tristia!

 ark neri egiñ dizkidan gauzak

 esatekuak ez dia,

 txurrero batek engañatuta

 eramandit emaztia.

 4

 Biar bezela funzionatzen

 ez dago errex fabrika,

 lau urte pasa alkarrekiñ da

 ez degu izan aurrika

 alegiñ egiñ faltan ez daukat

 kontzientziyan zorrikan

 oran Paris'eñ txurruak saltzen.

 an omen dabill karrika.

 5

 Bi gona motz ta kamisa zar bat

 besterik ez det ikusi,

 ziran diruak arrapatuta

 aldegiñ ziran igesi,

 baita toxa bat ederra

 bere tabako ta guzi,

 jayian aita gonbidatzeko

 ez ninduan gaizki utzi.

 6

 Alaxen ere desio dizut

 izan zazu osasuna,

 ¿non ote dago garai bateko

 gure aiskiretasuna?

 etsai gaxtuak au da burura

 zuri bialdu dizuna,

 orañ andriak bi toxa eta

 batere gabe gizona.

 7

 Txurrerua're lan senzillua

 da asko irabazteko,

 orrek biñipiñ ez du egiten

 mantendu eta jazteko,

 andriarekiñ alkar artuta

 ni modu ontan uzteko,

 bi kristau gaxtuak naikuak dira

 baztar guztiyak nasteko.

 8

 Andria iges juan zanian

 arren anayak esana,

 nere anaya dek Patxi baña

 etziak trapu zuzena;

 ni naiz orduan ajustadore

 Bayona'n ari nitzana,

 zuk orañ dezun txurreru ori

 ez bezelako gizona.

 9

 Ni emastiak utzi ninduan

 estadu triste batian

 beste batekiñ aldegiñ ziran

 anbat beretzat kaltian,

 txurruak janaz ederki dabill

 diruak aitu artian,

 ¿zer esan biar ote dit neri

 Josafatara juatian?

 10

 Gauzik onenak eta diruak

 arrapatuta juan tzian,

 nuen trajerik onena ere

 ostu ta eramantzian;

 gosiak zeon txurreru ori

 jarri da taju antziañ,

 orañ Paris-en bizi omen da

 trapero baten etxian.

 11

 Ez det milagro edukitzia

 malkoz bete ta muxuak

 kabi ta gazi iges egiñ dit

 tamañ ortako uxuak,

 nik berriz iñon ikusten badet

 adituko du gaxuak

 non ote dira garai bateko

 gure izketa goxuak?

 12

 Txurreru ori zer gizona dan

 sinistu entzun deguna,

 lana ogiteko gogua falta

 eta mingaña leguna;

 bedeinkatu izan dedilla

 aldegiñ zuten eguna

 gizarajuak arrapatu du

 bere moduko laguna