Mundu ontako bizi modua

Txirrita

 1

 Gure munduko bizi modua

 guziyentzat da laburra,

 griña gaistuak tiratzen gaitu

 ortatik dator makurra

 leku askotan ikusi oida

 lapur guardiyan lapurra

 animaliya ere igual,

 katua eta zakurra

 berak asko nai t'ezin sufritu

 bestek daraman apurra.

 2

 Armariyo zar batian nuen

 esperientziya ikusi,

 gure Pepita deskuidatuta

 atia zabalik utzi,

 katu "Moñoña" azkar sartu zan

 bere bigote ta gazi,

 sagua itota odolkiya artu

 goiko zapaira igesi;

 animaliyen artian ere

 lapur aundiya nagusi.

 3

 Alper askori gustatzen zayo

 bestek egiña jatia

 berentzat zer nai komenentzi ta

 pobriarentzat kaltia,

 lapur txikiyak preso sartuta

 gañera berriz katia,

 aundiyarentat libertadia

 beti zabalik atia;

 Kantabria'ko fueruak ere

 olaxe kenduak dia.

 4

 Mundu onetan dijuan martxa

 etzait askorik gustatzen,

 biar bezela portatzen baña

 errezago da jazgatzen,

 pobriarentzat amenazua

 kopeta dute boztutzen,

 sermoi ederrak aditu arren

 ez dira asko estutzen,

 lapur txikiyak preso sartuta

 berak milloyak ostatzen.

 5

 Lapur txikiyak kastigatzeko

 non nai badago kartzela,

 kupira gabe ematen zayo

 denbora askoko itzala

 esanaz egindako okerrak

 antxen pagatu ditzala;

 aundiyak libre ikusten dira

 pasiuan dabiltzala,

 ez projimua maite bagendu

 gere burua bezela.

 6

 Zakurrak ere lapurren kontra

 zaunkaz pasatzen du gaba

 nagusiyari adierazten

 fuerte zabalduaz aboa,

 mataderiya non da badaki,

 maiz asko juango da ara,

 usai oneko zudurra dute,

 belarriyak erne para,

 puska galantak artuko ditu

 iñor deskuidatzen bada.

 7

 Itsasuan zer gertatutzen dan

 ez aldezute ikusi?

 txardiñ berriya eta antxua

 izurdiaren igesi,

 azpiyan eziñ aguantatu ta

 gañera irten arasi,

 an ere arrantzaliak pronto

 beren sare eta guzi;

 anima salbo jende pobria

 gaur olaxe gera bizi.

 8

 Gure tartian gauza bat dago

 izugarri itsusiya,

 begiyetako bista ona ta

 iñor eziñ ikusiya;

 juezak alde daukazkiyenak

 irabazten du auziya

 eta orduan egingo diyo

 berak nai duan guziya;

 aundi gaxtuak nai duen arte

 txiki onaren biziya.

 9

 Mazopak ere txikiya janaz

 bokoya añako aliak,

 banda osua tragatzen dute,

 izugarrizko jaliak

 komenentziya badaukate ta

 mokadu onen zaliak,

 mendekuari ematen diska

 kulparik gabe daliak,

 uste gabian berak olaxe

 tragatzen ditu baliak.

 10

 Balia dute aundixkuena

 arrai guziyen tartian,

 kostara bakan arrimatzen da

 nayago du apartian

 ale batzuek gelditu dira

 Kantabriako partian

 iru edo lau inguru ori

 juandan berrogei urtian

 egun ederrak pasatzen ditu

 arpoya sartu artian.

 11

 Maite zaiztet Presidentiak

 Ministro-Diputaduak,

 biar bezela gauzak egiñaz

 izan tzitzute graduak,

 garai onetan zuek zerate

 Españiako buruak,

 despreziyorik ez du merezi

 Elizak eta kleruak;

 guk republika maiteko degu

 bañan ekarri Fueruak.

 12

 Arri Urdiñetako semia,

 ¡ay! orañ bizi baziña,

 ill da gerore maite zaitugu

 mundean iñor ez aña,

 orañ berroita amasei urte

 sortu ziguten kuziña,

 escritura bat Ernanin dago

 egiyazkua ta ziña,

 ori da Juan de Urbietaren

 Pakia'ko azaña.