Vanitas vanitatum
Lopez, Francisco
Arkitzen nintzan Kanpo-santuban
Isiltasunen erdian,
Eta bakarrik ¡bai! ¡aiñ bakarrik
Ainbeste jende artian!
Dana estaliya gurutz-autsi bat
Nekarren alde batian,
Eta apainduba urrezko letraz
Beste bat zeukan aurrian.
Arrek zekarren uda-berriak
Zabaltzen duben belarra,
Eta onek berriz osto eroridun
Arbolaundien adarra;
Laguntzik gabe bakardadian
Etor zitzaidan negarra,
An zegelako gurutzechua
Choko batian bakarra;
Eta choriyak egun sentian
Ipintzeko kantachoak,
Bildutzen ziran jatera, bere
Gañera zeuden kardoak.
Bestera nunbait etziran juaten
Ikusirikan gaisoak,
Zinta orridunak, argiyak eta
Gañera berriz koroak.
¿Zer da lurreko bizi au? niyon
jasorik gora begiyak,
Eta begiyak ichi zizkidan
Ordubanchen eguzkiyak.
Illuntasunan gelditu nintzan
Ichuturikan argiyak.
....................
¡Orduan jakin nuen zer ziran
Gure izate guztiyak!