Telebistaren eskaintza

Loidi, Arantzazu

 I

 ARGIAko lagunek

 ezker eskuz jota

 heldu zait pilota

 bertsoz egin ditzadan

 hainbat sake mota

 telebistari buruz

 alde eta kontra

 burura datorrena

 zuzen zuzen-konta

 ezingo dut inola

 txapapera bota

 II

 Alde positiboa

 nahi bada kontsola

 ez ahaztu inola

 informazio saila

 ta berdin kirola

 haurrei ere eskaintza

 ematen diola

 haientzako programa

 dago dariola

 aitortu behar hortaz

 indartsu dagola

 III

 Bost urte dela jaio

 zitzaigun umea

 ez al dago mehea?

 albotikan bizkia

 delako ernea

 hark edaten omen du

 amaren esnea

 "gure bi telebistak"

 diote ordea

 bi hoietan bakarra

 daukagu geurea

 IV

 Audientziei buruzko

 azken ikerketa

 ez da berriketa

 modutan aldatu da

 lehengo ametseta

 ikuslegoak zita

 ez du errespeta

 arrazoia aztertzen

 zertarako seta

 gure irakurleak

 ondo daki eta

 V

 Nire ustez non daukan

 akats nabarmena

 behar dut kondena:

 euskara mailan gaizki

 hor dago prolema

 ez da barkagarria

 zenbaiten hobena

 ikasi dezatela

 euskaraz aurrena

 itxuran esateko

 esaten dutena

 VI

 Eman dut nahiko kexa

 ta zenbaitzu galda

 isil nadin bada

 esperantzazkoa dut

 azken begirada

 jasotzen baldin badu

 guztion bultzada

 hartuko du indarra

 eta abiada

 espero dugu eta

 hobetuko al da!